रासायनिक मल ७१ हजार टन मौज्दात, ४५ हजार आउँदै

८ असार, काठमाडौं । प्रधानमन्त्री पुष्पकमल दाहाल प्रचण्डले विभिन्न बिक्री डिपोहरुमा ७१ हजार मेट्रिक टन रासायनिक मल मौज्दात रहेको संसदलाई जानकारी दिएका छन् । । शुक्रबार प्रतिनिधिसभा बैठकमा उनले गत वर्षको साउन महिनादेखि हालसम्म ३ लाख ५१ हजार टन रासायनिक मल आयात भएको बताए ।

उनले सोमध्ये ७१ हजार टन रासायनिक मल विभिन्न डिपोमा मौज्दात रहेको बताए । यही महिनाभित्र भारतको कलकत्ताबाट ४५ हजार टन डीएपी मल आउने छ । यो वर्ष धान रोप्ने सिजनमा विगतको जस्तो मल अभाव हुदैन । 

रासायनिक मलको आपूर्ति व्यवस्था विगतका वर्षमाभन्दा सुदृढ भएको र रासायनिक मलका लागि १५ अर्ब विनियोजन भएपनि थप २३ अर्बको स्रोत सुनिश्चित गरी मल आपूर्ति व्यवस्थालाई सुदृढ गरिएको उनले बताए । मलको आयातमा संघीय मन्त्रालयलाई जिम्मेवार बनाइएको र वितरणकार्यमा प्रदेश र स्थानीय तहहरुलाई परिचालन गरिएकाले सहजता भएको उनको भनाइ छ । 

मल वितरण प्रणालीलाई पारदर्शी बनाउन आपूर्ति र वितरणमा डिजिटल प्रणाली प्रयोगमा ल्याइएको उनले । प्रधानमन्त्रीले सदनलाई यो जानकारी दिएपनि यतिबेला देशभरका किसानले मल नपाएको गुनासो गरिरहेका छन् । भएको मल पनि सरकराले उचित रुपमा वितरण गर्न सकेको छैन् ।