प्रहरी जवान र हवल्दारलाई १६ वर्षमा अवकाश दिने व्यवस्था गरौं : रबि लामिछाने

८ असार, काठमाडौं । राष्ट्रिय स्वतन्त्र पार्टी (रास्वपा)का सभापति एवं सांसद रबि लामिछानेले नेपाल प्रहरीका जवान र हवल्दारलाई सेवा १६ वर्षमा अवकाश दिने व्यवस्था गर्नुपर्ने बताएका छन् ।

शुक्रबार प्रतिनिधिसभाको बैठकमा मन्त्रालयगत विनियोजन विधेयकमाथिको छलफलका क्रममा गृह मन्त्रालयको विनियोजित बजेट शीर्षकमाथि धारणा राख्दै उनले यस्तो कुरा बताएका हुन् । 

१६ वर्षे अवकाशबाट उनीहरु विदेशमा गएर काम गर्ने उमेर पनि कायम रहने र प्रहरी सेवामा अन्यले पनि अवसर पाउने उनको धारणा थियो । साथै प्रहरीलाई हिउँदमा ज्याकेट र वर्षात्का बेला पानी छल्ने पोशाक समयमै उप्लब्ध गराउन गृहमन्त्रालयको ध्यानाकर्षण गराए । प्रहरीको लत्ता कपडाका नगदै दिनुपर्ने बताए । यसबाट टेण्डरमा मिलेमतो हुने र कमसल सामानमा भर पर्नुपर्ने हैरानीबाट मुक्त हुन सकिने उनले बताए ।

मुलुकलाई अन्तर्राष्ट्रिय क्षेत्रमा सम्पत्ति शुद्धिकरणसम्बन्धी नीतिमा ‘ग्रे स्केल’मा पर्न लागेको सूचना आउनु चिन्ताको विषय भएको बताए । साथै नेपाली प्रहरीका बर्दीधारीलाई व्यक्ति सुरक्षाको नाममा घरघरमा पठाउने काम पुनः सुरु भएको भन्दै यसलाई तत्काल फिर्ता गर्न माग गरे ।

यस्तै रक्षा मन्त्रालयमाथिको बजेट शीर्षकमा उनले नेपाली सेनालाई समयानुकूल दक्ष र प्रविधियुक्त बनाउँदै लैजानु पर्ने बताए । यसमा बजेट कम भएको भन्दै थप गर्न सुझाव दिए ।