प्रधानमन्त्रीकाे सचिवालय विघटन गर्न सांसद पाण्डेको सुझाव

८ असार, काठमाडौं । सत्तारुढ दल नेकपा (एकीकृत समाजवादी)का उपाध्यक्ष एवम् सांसद राजेन्द्रप्रसाद पाण्डेले प्रधानमन्त्री पुष्पकमल दाहाल प्रचण्डले आफ्नो सचिवालय विघटन गर्न सुझाव दिएका छन् ।

‘प्रधानमन्त्री प्रश्नोत्तर कार्यक्रम’ का लागि एक जना सांसदले गरेको प्रश्नको जवाफसमेत तयार गरिदिन नसक्ने प्रधानमन्त्रीको सचिवालय आवश्यक नभएको उनको टिप्पणी थियो । शुक्रबार प्रतिनिधिसभा बैठकमा प्रधानमन्त्री तथा मन्त्रिपरिषद् कार्यालय, गृह मन्त्रालय, रक्षा मन्त्रालय, संस्कृति, पर्यटन तथा नागरिक उड्‌डयन मन्त्रालय, राष्ट्रपति कार्यालय, राष्ट्रिय योजना आयोगको विनियोजन शीर्षकमाथिको छलफलमा धारणा राख्दै सांसद पाण्डेले प्रधानमन्त्री प्रचण्डको सचिवालय अस्तव्यस्त रहेको दाबीसमेत गरे ।

प्रधानमन्त्री प्रचण्डले आफूमा शक्ति केन्द्रित हुने गरी प्रधानमन्त्री तथा मन्त्रिपरिषद् कार्यालयअन्तर्गत निकायलाई कायमै राखेकोमा पनि उपाध्यक्ष पाण्डेले आपत्ति जनाए । उपाध्यक्ष पाण्डेले सरकारले ल्याएको बजेट सन्तुलित नभएको भन्दै असन्तुष्टि जनाए । 

उनले प्रश्नोत्तर कार्यक्रममा सांसदले सोधेका प्रश्न समेत प्रधानमन्त्रीलाई नहुने अवस्थाका सचिवालयको हालत देखिएको भन्दै विघटन गर्दा इज्जत जोगिने टिप्पणी गरे । सांसद अम्बिकादेवी र अनिता देवी ३ दिनपहिल्यै टिपाएका प्रश्न प्रधानमन्त्रीको हातमा नहुँदा उनले प्रश्नकर्ताको नाम र प्रश्न सभामुखबाट लिनु परेको थियो । सभामुख देवराज घिमिरेले प्रश्न सोध्ने सांसदहरुको नाम टिपाएका थिए ।