सातवटै प्रदेशमा बिहानैबाट वर्षा, बाढी र पहिरोको उच्च जोखिम

९ असार, काठमाडौं । जल तथा मौसम विज्ञान विभागले आज बिहान देशभर सामान्यदेखि पूर्णतया बदली रहेको बताएको छ । कोसी, मधेस, वाग्मती, गण्डकी र लुम्बिनी प्रदेशका केही स्थानमा तथा कर्णाली र सुदूरपश्चिम प्रदेशका एकदूई स्थानमा मेघगर्जन र चट्याङसहित वर्षा भइरहेको छ ।

विभागका अनुसार आज दिउँसो देशभर सामान्य बदली रहनेछ । देशभर केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ । गण्डकी, लुम्बिनी र सुदूरपश्चिम प्रदेशका एकदुई स्थानमा भारी वर्षाको पनि सम्भावना रहेको छ ।
 
आज राति देशभर सामान्यदेखि पूर्ण बदली रहनेछ । देशका धेरै स्थानमा मेघगर्जनसहित हल्कादेखि मध्यम वर्षाको सम्भावना रहेको छ । वाग्मती, गण्डकी, लुम्बिनी र सुदूरपश्चिम प्रदेशका प्रदेशका एकदुई स्थानमा भारी वर्षाको सम्भावना रहेको छ । काठमाडौंमा बिहानैबाट वर्षा भइरहेको छ । वर्षा करिब १० बजेसम्म हुने मौसमविद् समिर श्रेष्ठले बताएका । १० बजेपछि पानी पर्न रोकिए पनि मौसम बदली भइरहन्छ ।  

हाल देशमा मनसुनी वायुको साथै भारतको उत्तर प्रदेश आसपास रहेको न्यूनचापीय प्रणालीको पनि प्रभाव रहेको छ । हिजोबाट मनसुन देशभर फैलिएको छ । यो वर्ष औसत समयभन्दा एकदिन ढिलोगरी मनसुन देशभर फैलिएको हो । जेठ ३१ गते यो वर्ष मनसुन नेपाल भित्रिएको थियो ।