राष्ट्रियसभा बैठकमा प्रधानमन्त्रीले महालेखा, महिला र दलित आयोगको प्रतिवेदन पेस गर्ने

१० असार, काठमाडौं । प्रधानमन्त्री पुष्पकमल दाहाल प्रचण्डले राष्ट्रियसभाको बैठकमा तीन प्रतिवेदन पेस गर्ने भएका छन् । राष्ट्रियसभाको १४ औँ अधिवेशनको १६ औँ बैठकमा प्रधानमन्त्रीले प्रतिवेदन पेस गर्न लागेको संसद सचिवालयले जनाएको छ । बैठक दिउँसो १ बजेर बस्ने छ ।

बैठकका लागि विभिन्न सम्भावित कार्यसूची तय गरिएको छ । प्रधानमन्त्री प्रचण्डले नेपालको संविधानको धारा ५३ बमोजिमको नेपाल सरकारको वार्षिक प्रतिवेदन, २०७८÷०७९, महालेखापरीक्षकको ६० औँ वार्षिक प्रतिवेदन, २०७९, राष्ट्रिय महिला आयोगको १५ औँ वार्षिक प्रतिवेदन, २०७८÷०७९ र राष्ट्रिय दलित आयोगको दोस्रो वार्षिक प्रतिवेदन, २०७८÷०७९ सभासमक्ष पेस गर्ने सम्भावित कार्यसूची छ ।
 
यस्तै, कानुन, न्याय तथा संसदीय मामिलामन्त्री धनराज गुरुङले मुलुकी संहितासम्बन्धी केही नेपाल ऐनलाई संशोधन गर्न बनेको विधेयक, २०८० पेस गर्नेछन् ।

राष्ट्रियसभाका अध्यक्ष गणेशप्रसाद तिमिल्सिनाले राष्ट्रियसभाका पूर्वसदस्य महेश चौधरीको निधनमा शोक प्रस्ताव प्रस्तुत गर्ने सम्भावित कार्यसूची रहेको संसद् सचिवालयले जनाएको छ ।