मेयर बालेन्द्रविरुद्ध रिटको पेशी न्यायाधीश ढुंगानाको एकल इजलासमा

१० असार, काठमाडौं । भारतीय चलचित्रलाई नेपाली हलमा चलाउने नदिने प्रकरणमा अदालतको अतरिम आदेश विरुद्ध बोलेका काठमाडौं महानगरपालिका मेयर बालेन्द्र शाहविरुद्ध अवहेलनाको उजुरी परेको छ । 

मेयर शाहले अदालतको अवहेलना गरेको भनी सर्वोच्च अदालतमा अधिवक्ता वर्षाकुमारी झाले कारवाही माग गर्दै निवेदन दर्ता गरेकी छिन् ।

अदालतको अवहेलना गरेको भन्दै मेयर शाहविरुद्ध अधिवक्ता झाले शुक्रबार रिट दायर गरेकी हुन्। उनले पेश गरेको निवेदन न्यायाधीश प्रकाशकुमार ढुंगानाको एकल इजलासमा पेशी तोकिएको छ ।

इजलासले आवश्यक ठानेर निवेदन अघि बढाएमा मात्रै त्यसले मुद्दाको रुप लिनेछ । केही दिनअघि मेयर शाहले भारतीय चलचित्रलाई नेपाली हलमा चलाउने नदिने भन्ने आफ्नो निर्णय विरुद्ध अन्तरिम आदेश दिएको उच्च अदालतको आलोचना गरेका थिए ।

मेयर बालेन्द्रले बिहीबार सामाजिक सञ्जालमा लेख्दै देशको सार्वभौमिकता र स्वाधीनताको सवालमा कुनै कानुन र अदालतलाई नमान्ने बताएका थिए। उनले उक्त आदेशको आफूले पालना नगर्ने भन्दै अदालत नै भारतबाट प्रभावित भएको आरोप लगाएका थिए ।

उनले सामाजिक सञ्जालमा जहाँ सवाल देशको सार्वभौमिकता र स्वाधीनताको आउँछ म कुनै कानुन र अदालतलाई मान्नेवाला छैन ।फिल्म लेखकले नेपाल भारत को अधिनमा थियो भनी सके पछि उनिहरुको नियत थाहा हुन्छ । यो कुरालाई नेपाल सरकारले  स्टन्ट भन्नू र अदालतले फिल्म चल्न दिनु भनेको नेपाल भारतको अधिनमा थियो , अदालत र सरकार भारत को गुलाम भएको बुजिन्छ  । यसको लागि  जुन सुकै सजाय भोग्न तयार छु तर फिल्म चल्दैन र चल्न दिइनेछैन भनि लेखेका थिए ।