सरकारले निल गाई र बाँदरले पुर्याउने बालीको क्षतिपूर्ति दिने

१० असार, काठमाडौं । सरकारले निल गाई र बाँदरले पुर्याउने खेती बालीको क्षतिपूर्ति दिने भएको छ । आइतबार प्रतिनिधिसभाको बैठकमा मन्त्रालयको विनियोजित बजेटमाथि सांसदहरुले सोधेका प्रश्नको जवाफ दिँदै वन तथा वातावरण मन्त्री वीरेन्द्रप्रसाद महतोले नील गाई र बाँदरले पुरयाएका बालीको क्षतिपूर्ति दिने व्यवस्था आगामी आर्थिक वर्षको बजेटमा व्यवस्था गरिएको बताए । 

उनले तराई नील गाई र पहाडमा बाँदरले बाली खाएर कृषकलाई बस्ती छाड्न बाध्य हुनुपर्ने अवस्था वृद्धि भइरहेको भन्दै पीडित किसानलाई उचित क्षतिपूर्ति दिन उपयुक्त मात्रामा बजेट छुट्याइएको जानकारी दिए । 

साथै मन्त्री महतोले देशभरका जंगलका काठ बिक्री सहज बनाउन कानून बनाउने काम भइरहेको र यसबाट काठ तस्करी घटाउन सहयोग पुग्ने जानकारी समेत दिए । आरक्षण र निकुञ्जका जनावर र आसपासका बस्तीका मानवबीचको द्वन्द्वलाई कम गराउन आवश्यक नीति लिने बताए । 

वन जोगाउन बिरुवा रोपन र बाढी पहिरो न्यूनिकरणका लागि वन विस्तार गर्ने नीति मन्त्रालयले लिएको उनको स्पष्ट पारे ।