पोखराको लेकसाइड बजार २४ घण्टा खोल्ने पोखरा महानगरको घोषणा, प्लास्टिकजन्य वस्तु जलाउन निषेध

१० असार, पोखरा । पोखरा महागरपालिकाले पर्यटकको मुख्य आकर्षण केन्द्र फेवाताल आसपासका बजार (लेकसाइड) २४ सै घण्टा खोल्ने घोषणा गरेको छ । 

महानगर प्रमुख धनराज आचार्यले आइतबार भएको १३औं नगरसभामा आर्थिक वर्ष ०८०÷८१ को नीति तथा कार्यक्रम प्रस्तुत गर्दै यस्तो जानकारी दिएका हुन् । २४ घटा खुला गर्न कार्यविधि बनाउने जानकारी दिए ।
साथै उनले फेवाताल संरक्षणमा सर्वोच्च अदालतले दिएको ६५ मिटर मापदण्डभित्र परेका संरचना हटाउन दिएको आदेश कार्यान्वयन गर्ने बताएका छन् । 

सर्वोच्चको आदेश कार्यान्वयन गर्न आवश्यक व्यवस्था मिलाइने उनले बताए । फेवाताल ६५ मिटर कायम गर्न र उक्त मापदण्डभित्र परेका संरचना हटाउन सर्वोच्च अदालतले असार ५ गते फैसला गरेको थियो ।

यस्तै, फेवातालसहित पोखराका विश्व रामसार सूचीमा परेका अन्य तालको सिमसार र जलाधार क्षेत्रको पनि संरक्षण गरिने महानगरले नीति लिएको महानगरले लिएको छ। ‘फेवा, बेगनास, रुपालगायत रामसार सूचीमा सूचीकृत तालहरुको जलाधार तथा सिमसार क्षेत्रको संरक्षणका लागि विशेष कार्यक्रम सञ्चालन गरिनेछ,’ मेयर आचार्यले भने ।

उनले बाँदर व्यवस्थापनका लागि सामुदायिक वनसँगको सहकार्य गरी आवश्यक नीति बनाउने प्रतिवद्धता जनाएका छन् । त्यसनिम्ति जंगलमै बाँदरको ‘मन पर्ने’ बाली केन्द्रित अनुसन्धानात्मक परियोजना सञ्चालन गर्नेजनाएको छ । 

आगामी आर्थिक वर्षबाट पोखरामा चल्ने सार्वजनिक यातायातमा अनिवार्य जिपिएस र विद्युतीय भुक्तानी प्रणाली जडान गरिने र २० वर्ष पुरानो सवारीसाधनलाई विस्थापन गर्ने मेयर आचार्यले बताए । साथै महानगरले ४० माइक्रोनभन्दा कम मोटाइका प्लास्टिक झोलाको प्रयोगलाई पूर्ण प्रतिबन्ध गर्ने सरकारको नीतिलाई प्रभावकारी रुपमा कार्यान्वयन गर्ने र सार्वजनिक स्थललाई प्लास्टिकका झोला, पानीका बोत्तल बिसर्जन गर्ने र जलाउने कार्य निषेध गर्ने जनाएको छ । 

विद्यालय तहका विद्यार्थीलाई दिवा खाजामा वृद्धि गर्ने घोषणा गरिएको छ । सरकारले प्रावितहका विद्यार्थीलाई दिँदै आएको दिवा खाजा खर्चमा १० रुपैयाँ थप गरी २५ रुपैयाँ पुर्‍याउने आचार्यले घोषणा गरे ।