बजेटमा ललितपुर महानगरले उछिन्यो भरतपुरलाई

१० असार, काठमाडौं । आगामी आर्थिक वर्ष २०८०/८१ का लागि प्रस्तुत बजेटमा ललितपुर महागनरपालिकाले भरतपुर महानगरपालिकालाई उछिनेको छ । दुवै महानगरले आगामी आवका लागि बजेट आइतबार सार्वजनिक गरेको छ । 

प्रधानमन्त्री प्रचण्डपुत्री रेणु दाहाल नेतृत्वको भरतपुर महानगरपालिका चितवनले ६ अर्ब ३१ करोड ७९ लाख रुपैयाँको बजेट सार्वजनिक गर्दा काठमाडौं उपत्यकाभित्रकाका दुई महानगरपालिकामध्ये चिरिबाबु महर्जन नेतृत्वको ललितपुर महानगरपालिकाले ६ अर्ब ५० करोड रुपैयाँको बजेट ल्याएको छ ।

ललितपुर महानगरले पुँजीगततर्फ ४ अर्ब २१ लाख ४६ हजार र  चालुतर्फ २ अर्ब ४९ करोड ८४ लाख ४२ हजार विनियोजन गरेको छ । महानगरले बजेटमा सडक पूर्वाधार र सम्पदामा जोड दिएको छ । 

यस्तै, काठमाडौं महागरपालिकाले आजै आगामी आवका लागि आफ्नो बजेट सार्वजनिक गरेको छ । उसले आगामी आर्थिक वर्ष २०८०÷८१ का लागि रु २५ अर्ब ५४ करोड ७८ लाख २० हजारको बजेट ल्याएको छ ।

पुँजीगततर्फ १६ अर्ब ९३ करोड २४ लाख ९२ हजार र चालुतर्फ ८ अर्ब ६१ करोड ५३ लाख २८ हजार रुपैयाँ छुट्याइएको छ । महानगरले चालु आवका लागि रु २५ अर्ब ४१ करोड ९६ लाख ९६ को बजेट विनियोजन गरेको थियो ।