सुनको जलहरी जोख्न अख्तियारको टोली पशुपतिनाथमा

१० असार, काठमाडाैं । पशुपतिनाथ मन्दिरको ज्योतिर्लिंगमा राखिएको सुनको जलहरी जाँच्नका लागि अख्तियार दुरुपयोग अनुसन्धान आयोगको टाेली पशुपतिनाथ मन्दिर पुगेको छ । जलहरी राख्दा अनियमितता भएको बाहिर आएपछि यसबारे अख्तियारले छानबिन गरिरहेको छ।

अख्तियारको टोलीमा खानी तथा भूगर्भ विभाग, गुणस्तर तथा नापतौल विभाग र नेपाल सुनचाँदी व्यवसायी महासंघका प्रतिनिधिहरू पनि संलग्न रहेको बताइएको छन्।

उनीहरूले जलहरीको तौल, सुनको गुणस्तर, तोकिए भन्दा कम रहे-नरहेको विषयमा परीक्षण गर्नेछन्। अख्तियारको टोली आउने भनेपछि पशुपतिनाथ मन्दिर पूरै खाली गराइएको थियो।

मन्दिरमा राखिएको जलहरीमा प्रयोग भएको सुनको तौल र गुणस्तर कम भएको भन्दै परेको उजुरीमाथि छानबिन गरिरहेको अख्तियारले आइतबार सुनको जलहरी जोख्न लागेको हो । अहिले मन्दिर परिसरमा सञ्चारकर्मी, सुरक्षाकर्मी र कार्यालय सम्बन्ध व्यक्तिहरू बाहेकलाई प्रवेश दिइएको छैन ।

अख्तियारका अनुसन्धान अधिकारीको रोहबरमा सुनचाँदी व्यवसायी संघका पदाधिकारी एवं विज्ञका साथै खानी तथा भूगर्भ विभागका अधिकारीहरू र पशुपति विकास कोषका पदाधिकारीलाई समेत राखेर सुनको जलहरी तौलने र गुणस्तरसमेत जाँच्ने कार्यक्रम छ ।