ग्रामीण विकास लघुवित्त वित्तीय संस्थामा तालाबन्दी

१० असार, काठमाडौं । दाङले तुलसीपुरको तल्लो फिल्म हल नजिक रहेको ग्रामीण विकास लघुवित्त वित्तीय संस्था लिमिटेडको तुलसीपुरमा शाखा कार्यालयमा तालाबन्दी गरेको छ । 

स्थानीय महिलाहरूलाई विभिन्न प्रलोभनमा पारी समूह बनाई आर्थिक शोषण गरेको भन्दै अनिश्चितकालका लागि तालाबन्दी गरिएको युवा संगठन नेपाल पश्चिम दाङले जनाएको छ ।

संस्थाले स्थानीयमाथि आर्थिक शोषण गरेको र मासिक बचत रकम समेत फिर्ता नगरेको आरोप लगाइएको छ । ॠण चुक्ता गर्न नसकेका महिलालाई मानसिक तनाव दिने गालीगलौज र अपशब्द प्रयोग गरी इज्जतमाथि नै आँच आउने किसिमका गतिविधि गरेको भन्दै सच्चिनका लागि प्रारम्भिक कारवाहीस्वरुप तालाबन्दी गरिएको बताइएको छ । 

संस्थाले महिलालाई झुक्याएर ऋणमा चर्काे ब्याज असुल गर्ने र यसबाट ऋणीलाई आत्महत्या तहसम्म पुर्याउने काम गरेको संगठनद्वारा जारी विज्ञप्तिमा जनाइएको छ । पीडितहरूकाे निवेदनका आधारमा पीडित र  स्थानीयको सहयोगमा संगठनले ब्यानरसहित तालाबन्दी गरेको हो ।