विराटनगर महानगरपालिकाको बजेट ३ अर्ब २८ करोड, राजश्वका शीर्षक बढाइयो

१० असार, मोरङ । कोशी प्रदेशका एकमात्र महानगर विराटनगर महानगरपालिकाले अआगामी आर्थिक वर्ष २०८०÷०८१ का लागि वार्षिक बजेट आइतबार सार्वजनिक गरेको छ ।

महानगरकी उपमेयर शिल्पा निराला कार्कीले प्रस्तुत गरेको कुल बजेट ३ अर्ब २८ करोड रहेको छ । कुल बजेटमध्ये चालुतर्फ १ अर्ब ५१ करोड ८३ लाख २५ हजार, पुँजीगततर्फ १ अर्ब ७१ करोड ६६ लाख ७५ हजार र वित्तीय व्यवस्थापनतर्फ ५ करोड रूपैयाँ विनियोजन गरिएको छ ।

महानगरले योपटक चालु आवको भन्दा बजेट घटाएर ल्याएको छ । चालू आवका लागि ४ अर्ब १७ करोड ९ लाख ९८ हजारको बजेट प्रस्तुत गरेको थियो । 

महानगरले दोश्रो छोरी जन्माउने आमाहरुलाई प्रोत्साहन गर्ने कार्यक्रमलाई निरन्तरता दिएको छ । आगामी आर्थिक वर्षबाट गर्भवती महिला, अपांगता भएका व्यक्ति र ८० वर्षभन्दा माथिका ज्येष्ठ नागरिकको उपचारमा निःशुल्क एम्बुलेन्स सेवा प्रदान गर्ने घोषणा गरेको छ । 

यस्तै, महानगरले उठाउने राजश्व शीर्षकमा थप गरेको छ । अपुताली सिफारिस गर्दा २ हजार, व्यवसायिक बहालमा लागेको कोठाको ताल्चा फुटाउन २ हजार, दर्ता नभएको व्यवसायको हकमा ३ हजार रूपैयाँ कर तिर्नुपर्ने भएको छ । 
स्टेशनरी, प्रिन्टिङ, आल्मुनियम स्टिल व्यवसाय, फोटो स्टुडियो, रेकर्डिङ स्टुडियो, राइड सेयरिङ व्यवसायलगायतलाई महानगरले करको दायरामा ल्याउने घोषणा गरेको छ ।