‘अखण्ड भारत’ नक्साबारे परराष्ट्रमन्त्रीको गोलमटोल जवाफ

११ असार, काठमाडौं । प्रतिनिधिसभा बैठकमा भारतले आफ्नो संसद भवनमा नेपालको भूभाग लुम्बिनी, कपिलवस्तु, विराटनगर लगायत समेत समेटेर राखेको ‘अखण्ड भारत’ नक्साबारे उठाएका परराष्ट्रमन्त्री एनपी साउदले स्पष्ट जवाफ दिन सकेनन् । यसअघिका बैठकमा उठाइएका प्रश्नको जवाफ सोमबार प्रतिनिधिसभाको बैठकमा दिँदै मन्त्री साउदले स्पष्ट जवाफ दिएनन् । 

उनले भारत पक्षले ‘अखण्ड भारत’ नक्सा राजनीतिक नभई राजा अशोकका बेला ऐतिहासिक भएको कुरा स्पष्ट पारिसकेको भन्दै यसमा थप भनिरहन नपर्ने जवाफ दिए । सांसदहरुले भारतले नेपाली भूभागमाथि निरन्तर अतिक्रमण गरिरहेको र नक्सामा समेत नेपाली भूभाग समेटेर हस्तक्षेप जारी राखेका बारे सरकारले भारतसँग सिधा कुरा किन गर्न नसकेको ? भनेर प्रश्न गरेका थिए । जवाफमा मन्त्री साउदले सपाट जवाफ दिन सकेनन् । उल्टै विदेशी नीतिसँग जोडिएको विषमा सांसदहरुले राजनीति खपत गर्न र भावनामा आएर प्रश्न उठाएको आरोप लगाए । 

विदेश नीतिसँग जोडिएका यस्ता मामिलामा खाली आन्तरिक राजनीति खपत गर्न र भावनात्मक कुरा गरेर मात्र संभव हुँदैन’ मन्त्री साउदले भने, ‘विषयको गम्भीर्यतालाई बुझेर मात्र विषय उठाउन म माननीय ज्यूहरुलाई आग्रह गर्छु ।’

उनले भारत भ्रमणका क्रममा प्रधानमन्त्री प्रचण्ड र भारतका प्रधानमन्त्री नरेन्द्र मोदीले संयुक्त पत्रकार सम्मेलनमा दुई देशको सीमा समस्यालाई दुवै देशबीच छलफलबाट गरिने भनेर बताइसकेको भन्दै सांसदहरुको प्रश्नको ठोस जवाफ नदिई टारेका छन् । 

साथै, नक्साबारे भारत पक्षसँग यथार्थ जानकारी लिएर अवगत गराउन भारतका लागि नेपाली राजदूतलाई पत्र पठाइसकिएको र जवाफ आउन बाँकी रहेको जानकारी दिए । सार्क सम्मेलनबारे उठाइएका प्रश्नको जवाफमा उनले सार्कका सबै सदस्य राष्ट्रहरुको सहमतिले मात्र सम्मेलन आयोजना संभवन हुने बताउँदै स्पष्ट जवाफ दिएनन् । भ्रमणका क्रममा प्रधानमन्त्रीबीचको वार्तामा परराष्ट्रमन्त्री अनुपस्थितिबारे राखेका प्रश्नप्रति उनी मौन बसे ।

सम्मेलन आयोजना गर्नेबारे परामर्श गर्ने दायित्वमा नेपाल रहेको छ । हाल सार्कका अध्यक्ष नेपाल रहेको छ ।