प्रस्तावित न्यायाधीशको विषय टुङ्गो नलागी निष्कर्षबिनै सकियो न्याय परिषदकाे बैठक

११ असार, काठमाडौं । सोमबार अपरान्ह्र बसेको न्याय परिषदको बैठक निष्कर्षबिनै सकिएको छ । न्यायाधीश नियुक्तिको एजेण्डासहित बसेको न्याय परिषदको बैठक विषय प्रवेश गरेर मात्रै निष्कर्षबिनै सकिएको हो ।

आज बसेको बैठकमा उच्च अदालतमा न्यायाधीश नियुक्तिका सम्बन्धमा छलफल भएपनि अर्को बैठकमा थप छलफल गर्ने गरी बुधबारका लागि बैठक बोलाइएको छ । 

आज बसेको बैठकमा एजेण्डामै प्रवेश नगरेकाले असार १३ गते बुधबार पुन: बैठक बोलाइएको न्याय परिषदका प्रवक्ता मानबहादुर कार्की बताए । प्रवक्ता कार्कीका अनुसार आज तीन घण्टा जति न्यायपरिषदको बैठक बसेकाे थियाे । बैठकमा न्यायाधीश नियुक्तिका विषयमा लामो छलफल भएपनि निर्णय भने हुन नभएकाले बुधबार बैठकबाट बाेलाइएकाे छ । 

न्यायपरिषद बैठक बस्नुअघि न्याय सेवा आयोगको बैठकसमेत बसेको थियो । बैठकले लोकसेवा आयोगबाट उत्तीर्ण भएका ७ जना उपसचिवहरूलाई नियुक्ति दिनुका साथै पदस्थापन गर्ने निर्णय भएको कार्कीले जानकारी दिए ।

 ३ जना उपसचिवहरूलाई सर्वोच्च अदालत, एक जनालाई कोशी प्रदेश सभा, एक जनालाई जिल्ला सरकारी वकिलको कार्यालय जुम्ला र एक जनालाई जिल्ला सरकारी वकिलको कार्यालय डोटीमा पदस्थापन गरिएको उनले बताए ।  प्रधानन्यायाधीश हरिकृष्ण कार्कीको अध्यक्षतामा न्यायपरिषद् तथा न्याय सेवा आयोगको बैठक बसेको थियो ।