बेहुली पक्षकाे उजुरीमा बेहुला विवाहमण्डपबाटै पक्राउ

१३ असार, काठमाडौं । दाइजोको प्रस्ताव राखेर बेहुलीसँग विवाह गर्न नमानेको आरोपमा प्रहरीले बेहुलालाई पक्राउ गरेको छ ।

बेहुलाले बेहुली पक्षसँग ५० लाख रुपैयाँ दाइजो मागेका थिए । दाइजो नपाएको भन्दै विवाह नगर्ने बताएपछि सुनसरीको दुहबी नगरपालिका–६ घर भई हाल काठमाडौंको ताहाचल बस्ने ३२ वर्षीय अनुराग रौनियार काठमाडौंको एक पार्टी प्यालेसमा तयार पारिएको विवाह मण्डपबाट काठमाडौं प्रहरीले पक्राउ गरेको हो । 

अमेरिकाको ग्रिनकार्ड प्राप्त रौनियारको यही असार १२ गते बुधबार काठमाडौंको नक्शालस्थित लिसेरा रिसेप्सन पार्टी प्यालेसमा विवाह हुँदै थियो । राैनियारविरूद्ध उजुरी परेपछि पक्राउ गरिएकाे हाे ।

रौनियारले ५० लाख रुपैयाँ दाइजो मागेको र २२ लाख रुपैयाँ लगिसकेको पाइएको छ । रौनियारले कानूनले बर्जित गरेको दाइजो मागेर बेहुलीलाई विवाह मण्डपमै गाली बेइज्जती तथा हातपात गरेको भन्दै प्रहरीमा जाहेरी दिएपछि सोका आधारमा प्रहरी वृत्त मालीगाउँले बेहुला रौनियारलाई पक्राउ गरी अनुसन्धान गरिरहेको बताइएको छ  । उनलाई काठमाडौं जिल्ला अदालतबाट हिजै ५ दिनको म्याद लिएर अनुसन्धान जारी राखेको छ ।