ललितानिवास प्रकरणमा पक्राउ परेकालाई हिरासतमा राख्ने अनुमति लिन अदालत लगियो

१३ असार, काठमाडौं । ललितानिवास जग्गा प्रकरणमा पक्राउ परेका व्यवसायी मीनबहादुर गुरुङ, पूर्व निर्वाचन आयुक्त सुधीरकुमार शाहलगायतलाई हिरासतमा राख्ने अनुमति लिन प्रहरीले जिल्ला सरकारी वकिल कार्यालयमा लगिएकाे छ ।

मंगलबार नेपाल प्रहरीको केन्द्रीय अनुसन्धान ब्यूरोले पक्राउ गरेको दोस्रो दिन चारैजनालाई म्याद थपका लागि हिरासतमा राख्ने अनुमति लिन बुधबार जिल्ला अदालतमा लगेकाे हाे । सीआईबीको टोलीले उनीहरूलाई उपत्यकाका विभिन्न स्थानबाट पक्राउ गरेको थियो। पक्राउ परेका चार जनाको बयानको आधारमा अनुसन्धान अघि बढाउने सीआईबीको तयारी छ। 

सरकारको स्वामित्वमा रहेको बालुवाटारस्थित ललितानिवासको जग्गा विभिन्न व्यक्तिका नाममा नामसारी गरेको आरोपमा प्रहरीले कारबाही अघि बढाएको छ। सोही प्रकरणमा यी चार जना पक्राउ परेका हुन्। अब उनीहरूलाई जिल्ला अदालत काठमाडौंमा लगिने प्रहरीले जनाएको छ ।

विसं २०४९ देखि २०६९ सम्ममा ललितानिवासको जग्गा लिखत कीर्ते गरी हिनामिना भएको सार्वजनिक भएको थियो । सोही प्रकरणमा सीआईवीले अनुसन्धान गरिरहेको छ । ललितानिवासको सरकारी जग्गा व्यक्तिको नाममा नामसारी गर्दा सरकारी कागजात कीर्ते गरेको आरोपमा सीआईबीले अनुसन्धान गरिरहेको छ ।