बुढीगण्डकी परियोजनाको शिलान्यास र कार्यालय उद्घाटन असारभित्रै गर्ने प्रधानमन्त्रीको प्रतिवद्धता

१३ असार, काठमाडौं । प्रधानमन्त्री पुष्पकमल दाहाल ‘प्रचण्ड’ले बुढीगण्डकी परियोजनाको कार्यालय उद्घाटन र शिलान्यास असार महिनाभित्रै गर्ने प्रतिवद्धता जनाएका छन् । 

बुधबार बसेको प्रतिनिधिसभा बैठकमा प्रधानमन्त्री तथा मन्त्रिपरिषद् कार्यालय, उपराष्ट्रपति कार्यालय र राष्ट्रिय योजना आयोगको सचिवालयको विनियोजन शिर्षकमाथि सांसदहरूले उठाएका प्रश्न र जिज्ञासाको जवाफ दिने क्रममा उनले बुढीगण्डकी परियोजनाको शिलान्यास र कार्यालय उद्घाटनको व्यवस्था असारभित्रे हुने गरी काम गर्न निर्देशन दिइसकेको जानकारी दिएका छन् । 

सांसद राजेन्द्र पाण्डेले परियोजनामा क्रमगत बजेट कटौती गरेको र यसको शिलान्यास गर्ने मिति तोक्न पटकपटक सरकारको ध्यानाकर्षण गराउँदै आइरहेका बेला प्रधानमन्त्री प्रचण्डले उक्त जानकारी दिएका हुन् ।

अर्बौ रुपैयाँ​​ लगानीमा धादिङ र गोरखाको सीमानामा पर्ने बुढी गण्डकी नदीमा बाँध बाँधेर ८२ वर्ग किलोमिटर क्षेत्रमा जलाशयमा आधारित बहुउद्देश्यीय परियोजना सरकारले आफ्नै लगानी बनाउने घोषणा गरेको छ । पपरियोजनाका लागि मात्रै जग्गा मुअब्जामा १७ अर्ब रुपैयाँ वितरण गरिसकेको छ भने अधिग्रहणको काम पनि चलिरहेको छ ।

परियोजनाबाट जलविद्युत उत्पादन,  सिंचाई, माछा पालन तथा पर्यटन प्रबद्र्धनबाट राज्यलाई राजश्वमा ठूलो योगदान पुग्ने विश्वास गरिएको छ । परियोजना बनाउन यसअघि चिनियाँ कम्पनीलाई दिएपनि पटकपटक म्याद थप गर्दा समेत बनाउन नसकेपछि सरकारले आफैंले बनाउन लागेको हो । परियोजनाका लागि सरकारले पेट्रोलियम पदार्थ बिक्रीमा उपभोक्ताबाट प्रत्यक्ष रुपमा प्रतिलिटर ५ रुपैयाँ कर उठाउँदै आइरहेको छ । 

असार महिनाभित्रै बुढीगण्डकी आयोजनाको कामलाई अगाडि बढाउने गरी आयोजनास्थलमा कार्यालय राखिने प्रधानमन्त्री प्रचण्डले भने ।