राष्ट्रपति पौडेल स्वास्थ्य अवस्था सामान्य भएपछि निवास फर्के

१३ असार, काठमाडौं । राष्ट्रपति रामचन्द्र पौडेल ११ दिनको अस्पताल बसाइपछि निवास फर्केका छन् । मुटुमा समस्या देखिएपछि अस्पताल भर्ना भएका राष्ट्रपति पौडेल बुधबार दिउँसो अस्पतालबाट डिस्चार्ज भएका हुन् । 

राष्ट्रपति पौडेल गत असार २ गते स्वास्थ्य उपचारको क्रममा त्रिभुवन विश्वविद्यालय शिक्षण अस्पताल तथा त्रिभुवन विश्वविद्यालय चिकित्सा शास्त्र अध्ययन संस्थान अन्तर्गत मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा भर्ना भएका थिए ।

आज ११ दिनको उपचारपछि स्वास्थ्यलाभ गरी राष्ट्रपति पौडेल निवास फर्केको सचिवालयले जनाएको छ। उपचारको क्रममा राष्ट्रपति पौडेलको छातीमा पेस मेकर राखिएको थियो । पेसमेकर भनेको छातीमा मुटुमाथि राखिने सानो यन्त्र हो। यो यन्त्रले मुटुको धड्कनलाई प्रति मिनेट तोकिएको मात्रामा धडकन सहयोग गर्छ।

राष्ट्रपति कार्यालयका प्रवक्ता शैलजा रेग्मी भट्टराईका अनुसार राष्ट्रपति पौडेलकाे स्वास्थ्य अवस्था अहिले सामान्य रहेको छ । राष्ट्रपति पौडेलले स्वास्थ्य उपचारका लागि गठित विशेषज्ञ समूहमा संलग्न चिकित्सकहरू, परामर्श समूहमा संलग्न विभिन्न अस्पतालका चिकित्सकहरू, स्वास्थ्यकर्मी, कर्मचारी तथा सुरक्षाकर्मीलगायत सबैलाई धन्यवाद प्रकट गरेका छन् ।