सिम्रिकलाई हेलिपोर्ट बनाउन मन्त्रालयले दिएको सहमतिप्रति प्राधिकरणको आपत्ति

१३ असार, काठमाडौं । संस्कृति, पर्यटन तथा नागरिक उड्डयन मन्त्री सुदन किरातीले काभ्रेको बनेपा नगरपालिका-१४ मा निजी क्षेत्रका सिम्रिक एयरलाइन्सलाई हेलिपोर्ट बनाउन दिएको सहमतिप्रति नेपाल नागरिक उड्डयन प्राधिकरणले आपत्ति जनाएको छ । 

सहमतिलाई कार्यान्वयन नगर्ने जनाएको छ । मन्त्री किराती र प्राधिकरणका महानिर्देशक प्रदीप अधिकारीबीच टसल चलिरहेको बेला निर्देशकले मन्त्री किरातीले सहमति कार्यान्वयन गर्न पठाएको पत्र कार्यान्वयन गर्ने जवाफ दिएका छन् । 

पर्यटन मन्त्रालयले काभ्रेको बनेपा नगरपालिका–१४ स्थित राउत गाउँको माथिल्लो भाग इटापु डाडाँमा अन्तर्राष्ट्रिय स्तरको हेलिपोर्ट बनाउन सिम्रिक एयरलाई सैद्धान्तिक सहमति दिएको थियो । सोबारे संसदमा सांसदहरुले समेत प्रश्न उठाएपछि मन्त्री किराँती सोमबारको प्रतिनिधिसभाको बैठकमा कानूनबमोजिम नै हेलिपोर्ट बनाउन सैद्धान्तिक सहमति दिएको स्पष्ट पारेका थिए । 

प्राविधिक र कानूनी दुबै दृष्टिकोणले निजी क्षेत्रलाई सो स्थानमा हेलिपोर्ट बनाउन दिनु उपयुक्त नहुने निष्कर्षसहित सहमतिलाई कार्यान्वयन नगर्ने निर्णय भएको प्राधिकरणका सूचना अधिकारी ज्ञानेन्द्र भुलले बताए । 

यसअघि महानिर्देशक अधिकारीलाई मन्त्री किरातीले यही सोमबार सोधेका ९ बुँदे स्पष्टीकरणको जवाफ पनि नदिने भन्दै अटेरी गरेका छन् । तोकिएका समयभित्र स्पष्टीकरण नबुझाए बर्खास्त गर्ने तयारी गरेको बुझिएको छ ।