हदम्याद सकिएको मुद्दामा पक्राउ गरिएको भन्दै सर्वोच्च गएका तीन आरोपीको रिट दर्ता, शुक्रबार सुनुवाइ

१४ असार, काठमाडौं । ललिता निवासको जग्गा अनियमिततामा मुछिएका तीनजना आरोपितहरु सर्वोच्च अदालतमा बन्दीप्रत्यक्षीकरणको निवेदन दिएका छन् । आफूहरुलाई गैरकानूनी रुपमा पक्राउ गरिएको दाबीसहित सुधीरकुमार शाह, धर्मप्रसाद गौतम र मिनबहादुर गुरुङले सर्वोच्च अदालतमा बन्दीप्रत्यक्षीकरणको निवेदन दर्ता गरेका हुन् ।

राज्यका निकायले कुनै पनि व्यक्तिलाई गैरकानूनी रुपमा पक्राउ गरे वा थुनामा राखेमा त्यसको कानूनी उपचारका लागि बन्दीप्रत्यक्षीकरणको निवेदन दिन सकिने कानुनी व्यवस्था छ । यसै व्यवस्थालाई टेकेर उनीहरु तीनै जनाले र्सोच्चमा रिट दर्ता गराएका हुन् । यसको भोली शुक्रबार सुनुवाइ हुनेछ । हदम्याद सकिएको अवस्थामा आफूहरुमाथि किर्तेको अभियोगमा अनुसन्धान गर्न खोजेको उनीहरुको जिकिर छ ।  

ललिता निवास जग्गा अनियमिततामा मुछिएकाहरुमध्ये १७ जनाले १५ महिनाअघि नै सर्वोच्च अदालतबाट अन्तरिम आदेश लिएर बसेका थिए । जसमध्येका ३ जना पक्राउ परेकै दिन गत मंगलबार रिहा भएका हुन् । त्यही बाटो समाउन अरु आरोपितहरु पनि बन्दीप्रत्यक्षीकरणको निवेदन लिएर सर्वोच्च अदालत गएका हुन् ।