बुटवलका आगन्तुक सहकारीका अध्यक्ष घर्ती पक्राउ

१४ असार, काठमाडौं । बचतकर्ताहरुले सहकारीमा जम्मा गरेको रकम हिनामिना गरेर फरार रहँदै आएका बुटवलका आगन्तुक बचत तथा ऋण सहकारी संस्थाका अध्यक्ष राजु घर्ती पक्राउ परेका छन् । 

बुटवलको अमरपथमा कार्यालय रहेको सहकारीलाई समस्याग्रस्त बनाएर घर्ती सम्पर्कविहीन भएपछि खोजी गर्ने क्रममा मंंगलबार भैरहवाबाट पक्राउ गरिएको प्रहरीले जनाएको छ । 

बचत रकम फिर्ता नदिई सम्पर्कविहीन भएपछि बचतकर्ताहरुले घर्तीलाई पक्राउ गरी कारवाही गर्न प्रहरीमा उजुरी दिएका थिए । ५० जनाभन्दा बढी बचतकर्ताहरुले उजुरी दिएका थिए ।  सहकारीमा जम्मा भएका ५० करोड भन्दा बढी रकम हिनामिना भएको बताइएको छ । 

यसै हप्ता मात्र भक्तपुरको कौशलटारमा केन्द्रीय कार्यालय रहेको शिवशिखर बहुउद्देश्यीय सहकारीका अध्यक्ष केदारनाथ शर्मालाइ भारतबाट पक्राउ गरी नेपाल ल्याइ प्रहरीले अनुसन्धान गरिरहेकाे छ । शर्माले बचतकर्ताकाे लगभग १४ अर्ब रूपैयाँ बचत रकम हिनामिन गरेकाे आराेप छ ।

आफ्नो बचत रकम फिर्ता पाउन माग गर्दै देशभरका विभिन्न सहकारीका पीडितहरु अहिले पनि माइतीघर मण्डलामा धर्ना दिइरहेका छन् ।