बैंक तथा वित्तीय संस्थामा निक्षेप खाताकाे संख्या कूल जनसंख्याभन्दा झण्डै दोब्बर

१४ असार, काठमाडौं । बैंक तथा वित्तीय संस्थामा निक्षेप खाता संख्या मुलुकको कुल जनसंख्याभन्दा झण्डै दोब्बरले बढी रहेको पाइएको छ । राष्ट्र बैंकका अनुसार बैंक र वित्तीय संस्थामा खुलेका निक्षेप खाता संख्या ५ करोड नाघेको छ । 

राष्ट्रिय जनगणना २०७८ का अनुसार नेपालको कुल जनसंख्या २ करोड ९१ लाख ६४ हजार ५ सय ७८ रहेको छ । तर निक्षेप खाता संख्या भने  गत वैशाखसम्म क, ख र ग वर्गका वित्तीय संस्थामा गरी कुल ५ करोड १ लाख १३ हजार ४ सय ९८ पुगेको छ । 

एक व्यक्तिले एकभन्दा धेरै बैंक तथा वित्तीय संस्थामा खाता खोल्न पाइने व्यवस्था कारण निक्षेप खाता संख्या दोब्बरको स्थितिमा पुगेको हो । सोही अवधिमा ऋण खाता भने जम्मा १८ लाख ४२ हजार ९ सय ३० रहेका छन् ।

यस्तै ‘प्रदेश र जिल्लास्तरमा वित्तीय साक्षरताको अवस्था र वित्तीय समावेशिताको स्थिति’ सम्बन्धी सर्वेक्षण–प्रतिवेदनले नेपालीको समग्र राष्ट्रिय स्तरमा वित्तीय साक्षरता ५७.९ प्रतिशत रहेको देखाएको छ ।