संघीयता कार्यान्वयनमा प्रदेशको भूमिका अहम छ,समस्या देखाएर जिम्मेवारीबाट नभाग्नूः प्रधानमन्त्री

१५ असार, पोखरा । प्रधानमन्त्री पुष्पकमल दाहाल प्रचण्डले संघीयता कार्यान्वयनमा संघकोभन्दा प्रदेशको भूमिका महत्वपूर्ण हुने बताएका छन् । उनले संघीय सरकारलाई मात्र दोष देखाएर प्रदेश सरकार भाग्न नमिल्ने र प्रदेश सरकार संघीयता कार्यान्यनमा उदाहरणीय भएर प्रस्तुत हुनुपर्ने बताएका छन् । 

शुक्रबार दिउँसो पोखरामा आयोजित अन्तर प्रदेश मुख्यमन्त्री बैठकको उद्घाटन समारोहलाई सम्बोधन गर्दै प्रधानमन्त्री प्रचण्डले संक्रमणकालका नाममा आर्थिक सामाजिक विकासमा ढिलाइ गर्ने छुट कसैलाई नभएको बताए । 

उनले तीनै तहमा भएका निर्वाचनले राजनीतिक संक्रमणको अन्त्य गरेको र अबको हाम्रो साझा गन्तव्य सुशासन र सम्बृद्धिमार्फत् समुन्नत नेपाल निर्माण गर्नु भएको बताउँदै संक्रमणकाल देखाएर जिम्मेवारीबाट नभाग्न सबैसँग आग्रह गरे । 
 
प्रचण्डले भने, ‘हामीले निकै लामो समय राजनीतिक संक्रमणमा नै बितायौं । जसले गर्दा देशको समग्र आर्थिक सामाजिक विकासका कार्यसूची ओझेलमा पर्दै गए । तीनै तहमा भएका निर्वाचनले राजनीतिक संक्रमणको अन्त्य गरेको छ । त्यसैले अबको हाम्रो साझा गन्तव्य सुशासन र सम्बृद्धिमार्फत् समुन्नत नेपाल निर्माण हो । तीन तहका सरकारबीचको समन्वय र सहकार्य नभई यो लक्ष्य पूरा हुन सक्दैन ।’ 

संविधानले तीन तहका सरकारहरूको कार्य र अधिकारको सूची स्पष्ट गरेको भन्दै उनले उपलब्ध साधनस्रोतको अधिकतम परिचालन गर्दै कार्यभार पूरा गर्नेतर्फ सबैको प्रयास हुनुपर्नेमा जोड दिए । सरकार आउने जाने भइरहन्छ, तर व्यवस्था संस्थागत भइसकेको र राजनीतिक संक्रमणको अन्त्य भइसकेकाले अब पनि संक्रमणणको नाममा आर्थिक सामाजिक विकासमा ढिलाइ गर्ने छुट हामी कसैलाई छैन, उनले भने ।