धान रोपाइँमा रमाए विद्यार्थी, कृषि औजारसम्बन्धी जानकारी दिइयाे (तस्बिरहरू)

१५ असार, काठमाडौं । आज देशैभर धान दिवस मनाएका छन् । सरकारले हरेक वर्ष असार १५ लाई राष्ट्रिय धान दिवस मनाउँदै आएको छ । सोही क्रममा आज किसान, नागरिक अगुवा, राजनीतिक दलका नेता कार्यकर्ता, कर्मचारी लगायतले धान रोपाइँमा सहभागिता जनाएर मनाएका छन् । 

ललितपुरको खुमलटारस्थित नार्कको कार्यालय परिसरमा कृषि तथा पशुपंक्षी मन्त्री वेदुराम भुसालले मेशिनबाट धान रोपाइँ गरेका छन् । भक्तपुर, काठमाडौं र ललितपुरमा भएको धान रोपाइँमा विद्यालय, कलेजका विद्यार्थी समेत रोपाइँमा सहभागी भएका छन् । काठमाडौंको तारकेश्वरमा विद्यार्थीले धान रोपाइँ गरेका छन् । उनीहरु हिलोमै भलिबल खेल्ने, हिलो छ्याप्ने जस्त क्रियाकलापमा रम्दै रोपाइँ गरे । 

यस्तै भक्तपुरको भक्तपुर नगरपालिका–२ मिवाछें व्यासीमा भएको धान रोपाइँमा एभरेष्ट स्कुलका छात्रछात्रा सहभागी भएका छन् । रोपाइँमा विद्यार्थीलाई  शिक्षकशिक्षिकाहरुले उनीहरुलाई रोपाइँमा प्रयोग हुने औजार, वस्तुबारे जानकारी गराएका थिए ।

तस्बीरहरू हेर्नुहाेस्ः