अति भैसक्यो, अब त छानविन गर्ला कि हवाई अड्डाका महानिर्देशक अधिकारीलाई अख्तियारले ?

१५ असार, काठमाडौं । कुनै बेला सडक इन्जिनियरबाट अवकाश पाएर आयल निगम छिरेका तत्कालीन प्रबन्ध निर्देशक गोपाल खड्काले विभागीय निर्देशनका कुरै छाडिदिऊँ, कुनै पनि व्यक्ति वा मन्त्रीलाई समेत गनेनन् । उनको एक मात्र ध्याउन्न हुन्थ्यो– कहाँबाट कसरी मोटो रकम हसुर्ने ?

आयल निगमको नेतृत्व गर्ने मौका पाउँदा निज खड्काले निगमलाई उकास्नुभन्दा घिसार्ने र धसाउने तिर दिलोज्यान दिए । चलनचल्तीकाे भन्दा चारगुना महँगोमा निगमलाई जग्गा भिराए । खड्काको चलखेल पत्रपत्रिकाबाट बाहिरियो । तर,  खै कसको आशीर्वादले हो, त्यता तिर सोधीखोजी नै भएन । होस् पनि किन ?

तत्कालीन शक्तिशाली अख्तियारका प्रमुख आयुक्त लोकमानसिंह कार्कीसँग उनको उठबस थियो । गर्नु–नगर्नु गर्दै जाँदा लोकमान आफैकाे अख्तियार बर्हिगमन पछि बल्ल गोपाल खड्काका भ्रष्टाचार प्रकरण खोदलियो अनि अख्तियारले ५ वर्षअघि झोसेको भ्रष्टाचारको आगोले बल्ल गत शुक्रबार उसको आर्थिक साम्राज्य ढाल्ने फैसला विशेष अदालतबाट आएको छ । अदालतको फैसला कार्यान्वयन हुँदा झण्डै–झण्डै अर्वपतिको लाइनमा रहेका गोपाल खड्का सडकपति पनि हुने हुन कि होइनन् ? हेर्दै गर्नु पर्ला ।

हो, ठ्याक्कै गोपाल खड्काको कार्यशैली सम्झाउने हवाई अड्डाका महानिर्देशक प्रदीप अधिकारीको पनि कार्यशैली उस्तै हो । ई. प्रदीप अधिकारीको पनि अख्तियारमै वा अन्यत्र कतै बलियो संरक्षणकर्ता हुनै पर्ने हो । अन्यथा, अख्तियार दुरुपयोग अनुसन्धान आयोगमा २०७९ वैशाख २१ गते दर्ता भएको सि–०३९९७७ को उजुरी उपर १५ महिना पुग्नै लाग्दा समेत अनुसन्धान भए–नभएको अत्तोपत्तो छैन । आफूभन्दा वरिष्ठलाई पछि पारेर नागरिक उड्डयन विभागको महानिर्देशक हुन सफल ई. प्रदीप अधिकारीले भैरहवा, पोखरा, काठमाडौं विमानस्थलमा के–कसरी भ्रष्टाचार गरेका छन् ? छर्लङ्ग छ ।

अहिले मिडियाले महानिर्देशक अधिकारीमाथि लगाएका आरोप त्यति बेलै दर्ता गरिएको उजुरीमा उल्लेख थियो । प्रक्रिया पूरा नभइकनै हतार हतारमा पोखरास्थित अन्तर्राष्ट्रिय विमानस्थलको चावी चीनका विदेशमन्त्रीको नेपाल भ्रमणको मौका छोपेर हस्तान्तरण गरिनु मै महानिर्देशक अधिकारी भ्रष्टाचारको आरोपबाट डामिनबाट जोगिनुको प्रयास थियो ।

चिनियाँ सरकारकै सहयोगमा निर्माण भएको उस्तै प्रकृतिको लुम्बिनीकाे भन्दा पोखराको विमानस्थल कयौं गुणा लागत बढी हुनु नै आर्थिक अनियमितता बढी गरिनु हो भन्ने सबैले देखे जानेकै विषय थियो । पोखरा विमानस्थलको चावी हस्तान्तरण गरिँदा विमानस्थलमा चाहिने एटीएफ, फ्यूल स्टोर लगायतका थुप्रै संरचनाहरू निर्माणतर्फ सुरसार नै देखिएको थिएन । उडान र अवतरण कार्यको सहजताका लागि डाँडा कटान कार्य पनि आधाआधी बाँकी नै थियो । हस्तान्तरणको एक वर्षपछि बल्ल मिडियाले उठाएका विषयमा मन्त्रालयको ध्यान पुगेको छ र विभागीय मन्त्रीले स्पष्टीकरण समेत मागेका छन् । तर, कुन्नि कस्को आड बलमा हो, महानिर्देशक अधिकारीले उक्त स्पष्टीकरणको जवाफ नदिने अहमपना देखाएका छन् ।

११ औं तहका सिभिल इन्जिनियरको योग्यता भएका प्रदीप अधिकारी नागरिक उड्डयन प्राधिकरणको महानिर्देशक कसरी बन्न सके ? यतातिरको पाटो कोट्याउने हो भने पोखरा विमानस्थलमा भएको आर्थिक अनियमितताको उजागर पक्कै पनि हुनेछ । पोखरा विमानस्थल निर्माण आयोजनाका आयोजना प्रमुखका रुपमा लामो समय जिम्मेवारी बहन गरेका प्रदीप अधिकारीले त्यहाँ गरेको आर्थिक अनियमितताको थैली शक्तिकेन्द्रमा बुझाउन सकेकै कारण आफूभन्दा अनुभवी र जेष्ठ सदस्यलाई पछारेर महानिर्देशक पद हात पारेको कतैबाट छिप्दैन । नत्र हवाई उड्डयन (एभियसन) सम्बन्धी अनुभव, ज्ञान नै नभएको सिभिल इन्जिनियरले हवाई उड्डयनको प्रमुख पद हासिल गर्न सक्ला ? कल्पना गर्न पनि सकिँदैन ।

४३ वर्षीय अधिकारी लमजुङबाट चितवनको चैनपुर बसाई सरेका हुन् । सातौं तहमा २०६४ मा नागरिक उड्डयन प्राधिकरणमा प्रवेश गरेका अधिकारी २०७४ मा मात्रै आठौं तहमा बढुवा भएका थिए । हाल ११ औं तहमा रहेका उनी आफूभन्दा आधा दर्जन बढी वरिष्ठ एवं दक्ष प्रतिस्पर्धालाई पछाडि पारेर महानिर्देशकमा छानिएका हुन् ।

विगतमा प्रत्येक परियोजनामा फरक–फरक व्यक्ति आयोजना प्रमुख रहँदै आएकोमा अधिकारीले आर्थिक प्रभावमा पारेर तत्कालीन प्राधिकरण महानिर्देशक संजीव गौतम महानिर्देशक भएपछि पोखरा, भैरहवा र निजगढ अन्तर्राष्ट्रिय विमानस्थलको परियोजनामा प्रमुख बनेर आर्थिक रुपमा दाँई खेल्ने कसरत सुरु गरेका हुन् । यिनले काठमाडौं विमानस्थल परिसरमा पनि व्यक्तिलाई व्यवसायिक भवन निर्माण गर्न दिएर मोटो रकम लाभ लिएको चर्चा छ । ३ वटै ठूला परियोजनाको आयोजना प्रमुख भएकै बेला उनी ‘सिभिल चिफ’ पनि बने । एकातिर ठूला आयोजनाको आयोजना प्रमुख र अर्कातिर कार्यालयको ‘सिभिल चिफ’ बनेर उनले गर्नुसम्मको आर्थिक घोटाला गरेको बताइन्छ ।