पीडितलाई न्याय र पीडकलाई कारबाही हुन्छ, वित्तीय अनुशासन उल्लंघन गर्नेमाथि कारवाही हुन्छ: मन्त्री गुरुङ

१७ असार, काठमाडौं । कानुन, न्याय तथा संसदीय मामिलामन्त्री धनराज गुरुङले वित्तीय अनुशासन उल्लंघन गर्ने जो कोहीलाई पनि सरकारले कारवाही गर्ने बताएका छन् । उनले सरकारले अवैध सम्पत्तिलाई नियन्त्रण गर्ने कुरामा कसैसँग सम्झौता नगर्ने दावी गरेका छन् । 

आइतबार प्रतिनिधिसभाको दोसो बैठकमा ‘मुलुकी संहितासम्बन्धी केही नेपाल ऐनलाई संशोधन गर्ने विधेयक, २०८०’ माथिको सैद्धान्तिक छलफलमा भाग लिने क्रममा सांसदहरुले उठाएका प्रश्नको जवाफ दिने क्रममा उनले कालो धन, अवैध सम्पत्तिलाई नियन्त्रण गर्ने कुरामा सरकारले ठूलो–सानो, दायाँ–बायाँ केही पनि नहेर्ने बताए । 

मन्त्री गुरुङले सरकार पीडितलाई न्याय दिने र पीडकलाई कारबाही गर्ने कुरामा पछि नपर्ने पनि पटक–पटक दोहोर्याए । उनले भने, ‘कालोधन, अवैध सम्पत्तिलाई नियन्त्रण गर्नुपर्ने कुरामा दुई मत रहेन । यसको हेलचक्य्राइँ भइरहेको सन्दर्भ उठेको छ । पटक्कै हेलचक्य्राइँ गर्न खोजिएको छैन । माथि होस कि तल । दायाँ होस कि बायाँ कोही पनि पीडकलाई छोडनु हुन्न र छोडिन्न । 

सरकार जहिले पनि न्यायाका पक्षमा उभिने र यसका कुनै किसिमको कमजारी हुन नदिने बताए । ‘हामी पीडितको पक्षमा उभिन्छौं भने माथिलाई छोड्ने, तललाई समात्ने हुँदै होइन । सरकार अहिले त्यही बाटोमा अघि बढिराखेको छ । ठूलो–सानो हामी हेर्दैनौं । अनुहार पनि हेर्दैनौं । राजनीतिक पार्टी पनि हेर्दैनौं ।’ मन्त्री गुरुङले वित्तीय अनुशासन उल्लंघन गर्नेहरूलाई कुनैपनि बहानामा सरकारले नछोडने बताए ।