सात दिनभित्र ललितानिवास भित्रका संरचना हटाउन महानगरको अल्टिमेटम, अटेर गरे डोजर चलाइने

१७ असार, काठमाडौं । काठमाडौं महानगरपालिकाले ललितानिवासको जग्गाभित्र रहेका संरचना हटाउन सातादिनको समय दिएको छ । यस क्षेत्रभित्र थप संरचना नबनाउन र भएका संरचना हटाउन महानगरले निर्देशन हो । संरचना हटाउन अटेर गरे महानगरले डोजर लगाएर भत्काउने भएको छ । 

आइतबार बालुवाटारस्थित ललितानिवासको जग्गामा तारबार लगाउन महानगले टोली पठाएको थियो । महानगर प्रहरीको टोलीले सार्वजनिक जग्गा संरक्षणको जिम्मेवारी स्थानीय सरकारको भएकाले उक्त जग्गाभित्र रहेका संरचना हटाउन र नयाँ संरचना नबनाउन महानगरको निर्देशनबारे जानकारी दिएको छ । अन्यथा महानगर आफैंले हटाउने चेतावनीसमेत दिइएको छ ।  

ललिता निवासको जग्गामा निर्माण भएका अस्थायी वा अनधिकृत संरचना काठमाडौं महानगरपालिकाले हटाउने भन्दै टोली पठाएको हो । महानगरको टोली ललिता निवास परिसरमा पुगेर ललिता निवासमा संरचना हटाउन सूचना टाँस्दै त्यस क्षेत्रलाई तारबारले घेरा गर्ने तयारी गरेको छ ।

महानगरका प्रहरी प्रमुख राजुनाथ पाण्डेका अनुसार महानगरको स्वीकृति बिना निर्माण भएका वा निर्माणाधीन संरचना हटाउन भन्दै सूचना टाँसिएको हो । साथै उक्त क्षेत्रलाई तार घेराबारका लागि पनि महानगरको प्राविधिक टोलीले तयारी गरिरहेको पाण्डेले बताए ।

मेयर बालेन्द्र शाहका स्वकीय सचिव भुपदेव शाहले सार्वजनिक जग्गा संरक्षण गर्ने दायित्व स्थानीय सरकारको भएकाले तारघेराबारा गर्न लागिएको बताए । उनले भने, ’हामीले सोमबारसम्म ललिता निवासभित्र बनाइएका अस्थायी र अनुमति नलिइकन बनाइएका संरचना हटाउन भनेर माइकिङ गरेका छौं ।’

ललिता निवासको जग्गा गैरकानुनी रुपमा व्यक्तिका नाममा सारेर भ्रष्टाचार गरेको आरोपमा निर्वाचन आयोगका पूर्वआयुक्त, भाटभटेनी सुपरमार्केटका संचालकसहित चार जना प्रहरी हिरासतमा छन् ।