विश्वविद्यालयमा दलको झोला बोक्नेलाई प्रवेश रोक्न प्रधानमन्त्रीको हस्तक्षेप जरुरी : गगन थापा

१८ असार, काठमाडौं । नेपाली कांग्रेसका महामन्त्री गगनकुमार थापाले विश्व विद्यालयमा राजनीति दलको झोला बोकेर छिर्ने जोकोहीलाई रोक्न प्रधानमन्त्रीले हस्तक्षेप गरेर रोक्नुपर्ने बताएका छन् । उनले विश्विद्यालयमा राजनीतिक भागबण्डाबाट अलग राख्न सकेमात्र शिक्षाको गुणस्तरीयता कायम हुने बताए । 

सोमबार काठमाडौंमा आयोजित गिरिजाप्रसाद कोइरालाको शतवार्षिक समारोहलाई सम्बोधन गर्दै संघीय सांसद समेत रहेका महामन्त्री थापाले दलको झोला बोकेर विश्वविद्यालय छिर्न रोक लगाउन प्रधानमन्त्री हस्तक्षेप अनिवार्य भएको बताए । 

राजनीतिक दलहरूले भागबन्डाकै कारणले विश्वविद्यालयको स्तर खस्केको उनको भनाइ थियो । विश्वविद्यालयमा राजनीतिक भागबण्डाबाट टाढा राख्न प्रधानमन्त्रीले सशक्त भूमिका खेल्नुपर्नेमा जोड दिए । विश्वविद्यालयका कुलपति प्रधानमन्त्री रहने व्यवस्था छ । मुलुकमा दर्जन भन्दा बढी विश्वविद्यालय रहेका छन् । 

अर्को प्रसंगमा महामन्त्री थापाले भ्रष्टाचारविरुद्धको अभियानमा सरकारलाई साथ दिन आफू सधैं तयार रहेको बताए । ‘भ्रष्टाचारविरुद्धको अभियानमा सिंगो देश र जनता साथमा छ, म आफू पनि जहाँ जतिबेला पनि उभिन तयार छु’ उनको भनाइ थियो ।

दुई हप्तापहिले समाजवादी मोर्चालाई घोषणापछि प्रधानमन्त्री प्रचण्ड र थापाबीच सार्वजनिक मञ्चबाटै घोचपेच चल्दै आइरहेका बेला पहिलोपटक समारोहमा एकै मञ्चमा देखिएका छन् ।

सोही शतवार्षिकी समारोहमा प्रधानमन्त्री प्रचण्डले मुख्य वक्ताको रुपमा कोइरालाको योगदाबारे चर्चा गरेका थिए ।