ललितानिवास जग्गा हिनामिना प्रकरणमा थप २ जना पक्राउ, पक्राउ पर्नेको संख्या ९ पुग्यो

१८ असार, काठमाडौं । प्रधानमन्त्रीको सरकारी निवास बालुवाटारमा रहेको ललितानिवास जग्गा प्रकरणमा थप दुई जना पक्राउ परेका छन् । पक्राउ पर्नेमा रमेशकुमार पोखरेल र देवनारायण महर्जन रहेका छन् । 

उनीहरूलाई नेपाल प्रहरीको केन्द्रीय अनुसन्धान ब्यूरो (सीआईबी) को विशेष टोलीले सोमबार बिहान काठमाडौंका विभिन्न स्थानबाट पक्राउ गरेको हो । पोखरेल र महर्जन पक्राउ परेको ब्यूरोका एसएसपी दिनेश आचार्यले बताए ।

महर्जन जग्गा हिनामिनामा नक्कली मोहीका आरोपी हुन् भने पोखरेल जग्गा हिनामिना तानिएका समरजङ कम्पनीका तत्कालीन प्रमुख हुन् । योसँगै जग्गा हिनामिना प्रकरणमा पक्राउ पर्नेको संख्या ९ पुगेको छ । 

यसअघि यसअघि गत मंगलबार भाटभटेनी सुपरमार्केटका सञ्चालक मीनबहादुर गुरुङ, धर्मप्रसाद गौतम, सुधिर शाह र गोपाल कार्की र हिजो आइतबार शिवजी भट्टराई, बाबुराजा महर्जन र नापीका कर्मचारी घमनकुमार कार्कीलाई पक्राउ गरिसकेको छ । 

पक्राउ परेका ३ जनालाई भने अदालतबाट ‘स्टे अर्डर’ लिएका कारण बोलाउँदाका बखत उपस्थित हुने गरी प्रहरीले कागज गराएर छाडेको छ । थुनामा रहेका गुरुङसहित ३ जनाले भने थुनामुक्त हुन पाउन सर्वोच्चमा बन्दी प्रत्यक्षीकरण रिट दर्ता गराएका छन् । अन्तिम टुंगो लाग्न बाँकी छ । रिटमा प्रारम्भिक सुनुवाइ गर्दै सरकारको नाममा कारण देखाउ आदेश दिइसकेको अवस्था छ ।