पहिरोले बैतडीको जयपृथ्वी राजमार्ग १४ घण्टादेखि अवरुद्ध

१८ असार, काठमाडौं । बैतडीमा वर्षासँगै आएको पहिरोका कारण जय पृथ्वी राजमार्ग करिब १४ घण्टादेखि अवरुद्ध भएको छ । सुर्नया गाउँपालिका–६ मोतीनगरस्थित जय पृथ्वी राजमार्ग अन्तर्गत खोडपे–बझाङ सडकमा पहिरो खसेर गएरातिदेखि सडक अवरोध भएको छ ।

यस्तै, सुर्नया गाउँपालिका–८ ढोल्यामोडस्थित जय पृथ्वी राजमार्ग अन्तर्गत खोडपे–बझाङ सडकमा वर्षाका कारण ठूला ढुंगासहित पहिरो खस्दा सडक अवरोध भएको प्रहरीले जनाएको छ । 

अहिले सडकमा पहिरो हटाउने काम भइरहेको प्रहरीले जनाएको छ । राजमार्ग अवरुद्ध हुँदा भाडा र निजीका सयौं सवारी दुई तर्फ रोकिएका छन् । बिच बाटोमा रोकिएका यात्रुहरु अलपत्र मात्र नभई खानेकुरा समेत पाउन नसकेर समस्यामा परेका छन् । राजमार्गमा बैतडी हुँदै बझाङ जाने र बझाङबाट बाहिरिने यात्रु समस्यामा परेका हुन् । 

अवरोध हटाएर राजमार्ग सुचारु हुन केही समय लाग्ने प्रहरीको भनाइ छ । यसैबीच पहिरोका कारण आइतबार रातिदेखि बन्द भएको मुिग्लन–नारायणगढ सडक खण्ड सोमबार बेलुकाबाट दुई तर्फी संचालनमा आएको छ । पहिरोका जोखिम कायमै रहेकाले सर्तकता अपनाउन सवारी चालकहरुसँग चितवन प्रहरीले अनुरोध गर्दै आएको छ ।