ललितानिवास जग्गा प्रकरणका ३ आरोपीको बन्दी प्रत्यक्षीकरण रिटकाे पेसी संयुक्त इजलासमा

१९ असार, कठमाडौं । प्रधानमन्त्रीको सरकारनिवास बालुवाटारस्थित ललितानिवासको सरकारी जग्गा हिनामिना प्रकरणमा पक्राउ परेका ३ जनाको बन्दी प्रत्यक्षीकरण रिट निवेदनमाथि आज सर्वोच्च अदालतमा सुनुवाइ हुँदैछ । 

सुनुवाइका लागि सर्वोच्च अदालतका न्यायाधीशद्वय आनन्दमोहन भट्टराई र हरिप्रसाद फुयाँलको इजलासमा परेको छ । शुक्रबार प्रारम्भिक सुनुवाइ गर्दै न्यायाधीश कुमार चुडालको एकल इजलासले २४ घण्टाभित्र लिखित जवाफ पेस गर्न आदेश दिएको थियो । आदेशबमोजिम प्रतिवादीहरुले सोमबार लिखित जवाफ बुझाइसकेका छन् । 

प्रहरीको केन्द्रीय अनुसन्धान ब्यूरोले पक्राउ गरेर बालुवाटार जग्गा प्रकरणमा ठगी र किर्तेको कसुरमा अनुसन्धान अगाडी बढाएपछि सुधिर कुमार शाह, धर्मप्रसाद गौतम र मिनबहादुर गुरुङले बन्दी प्रत्यक्षीकरणको रिट दायर गराएका थिए । 

शाहका तर्फबाट अभिषेक शाह, गौतमका तर्फबाट सरोज गौतम र गुरुङका तर्फबाट विद्या गुरुङले यही असार १३ गते रिट दायर गरेका थिए । अभियुक्ति तीनै जनालइ ललितानिवासको ११२ रोपनी सरकारी जग्गा हिनामिना कसुरमा अनुसन्धानका लागि सीआईबीको टोलीले असार १२ गते पक्राउ गरिएको थियो ।

सो प्रकरणमा हालसम्म ९ जना पक्राउ परेका छन् । ३ जनालाई भने पक्राउ नगर्न अदालतलबाट आदेश लिएका कारण बोलाएका बखत उपस्थित हुने गरी प्रहरीले कागज गराएर छाडेको छ ।