मौद्रिक प्रणालीमा जम्मा भएको अधिक तरलता खिच्न राष्ट्र बैंकद्वारा २० अर्बको रिपो जारी

१९ असार, काठमाडौं । नेपाल राष्ट्र बैंकले मंगलबार २० अर्बको रिभर्स रिपो जारी गरेको छ । बैंकिङ प्रणालीमा अधिक तरलता बढेपछि यसलाई तान्न रिपो जारी गरिएको राष्ट्र बैंकले जनाएको छ । राष्ट्र बैंकले रिपो जारी गरेर रकम खिचेको यो चौथो पटक हो । 

निक्षेप जम्मा अनुसार लगानी नभएपछि यतिबेला बैंकिङ प्रणालीमा तरलता थुप्रिएको छ । असारको  ७ र १० गते रिभर्स रिपो जारी गरेको राष्ट्र बैंकले मंगलबार पुनः २० अर्ब रूपैयाँको रिभर्स रिपो जारी गरेको हो । रिपो प्रणालीमा अधिक भएको तरलता तान्ने मौद्रिक औजार हो । 

राष्ट्र बैंकले असार ७ मा १० अर्ब र १० गते २० अर्ब रूपैयाँ रिभर्स रिपो जारी गरेको थियो । प्रणालीमा करिब ४० अर्ब रुपैयाँ अधिक तरलता रहेको राष्ट्र बैंकको भनाइ छ । तरलता बढेपछि त्यसलाई तान्न राष्ट्र बैंकले चालू आर्थिक वर्षमा चौथो पटक रिभर्स रिपो जारी गरेको हो ।

राष्ट्र बैंकले चैत १० गते पनि ५ अर्बको रिभर्स रिपो जारी गरेर रक खिचेको थियो । रिभर्स रिपो जारी गरेपछि अन्तर बैंक ब्याज दर उक्लिदै गएको छ । अहिले बाणिज्य बैंकहरुमा निक्षेप रकम बढिरहेको छ । कर्जा लगानी नभएका कारण निक्षेपको रकम स्थिर रहेको हो ।