संसदीय समिति सभापति तत्काल चयन गर्न शीर्ष नेताहरु सहमत : सभामुख घिमिरे

१९ असार, काठमाडौं । सभामुख देवराज घिमिरले संसदीय सभापति चयन गर्न प्रमुख तीन दलका शीर्षनेताहरुले प्रतिवद्धता जनाएको जानकारी दिएका छन् । 

मंगलबार सिंहदरबारस्थित आफ्नै कार्यकक्षमा बोलाएर सभामुख घिमिरले संसदीय समिति सभापति चयन गर्ने विषयमा ध्यानाकर्षण गराएपछि उनीहरुले सो प्रतिवद्धता जनाएकाे घिमिरेले संचारकर्मीहरुलाई बताए । 

बैठकमा प्रधानमन्त्री तथा माओवादी अध्यक्ष पुष्पकमल दाहाल ‘प्रचण्ड’, कांग्रेस सभापति शेरबहादुर देउवा, प्रमुख प्रतिपक्ष एमाले अध्यक्ष केपी शर्मा ओली, कांग्रेस उपसभापति एवं कानूनमन्त्री धनराज गुरूङ लगायत सहभागी थिए ।  

दलहरुबीचको खिचातानीका कारण दर्जन बढी संसदीय (विषयगत) समितिका सभापति हुन सकेका छैनन् । हाल समितिका ज्येष्ठ सदस्यले बैठकमा सभापतित्व गर्दै आएका छन् । सभापति चयन हुन नसक्दा नियमित बैठक र समितिले लिनुपर्ने जरुरी निर्णयहरु गर्न सकेका छैनन् । जसका कारण संसदका कामकारवाही प्रभावित बनेकाे छ ।

विषयगत समितिमा पुगेका विधेयकहरु थन्किएका छन् । विधेयक विषयगत समितिमा छलफल सकेपछि मात्र संसदमा पेस हुने व्यवस्था छ । सभापति दलीय समझ्रदारीमा चयन नभए आवश्यक कदम चाल्ने पक्षमा आफू पुगेको घिमिरेले बताए । सहमतिमा सभापित चयन नभए चुनाव गराउने अधिकार सभामुखलाई छ ।