संसदीय समितिको सभापति चयन तत्कालै गर्ने नेताहरुको प्रतिबद्धता

१९ असार, काठमाडौं । शीर्ष दलहरुबीच संसदीय समितिको नेतृत्व चयन प्रक्रिया अघि बढाउने सहमति भएको छ ।  सभामुख देवराज घिमिरेले बोलाएको  शीर्ष नेताहरुको छलफलका क्रममा छिटो भन्दा छिटो संसदीय समितिको नेतृत्व चयनका लागि प्रक्रिया अघि बढाउने सहमति भएको हो । छलफलमा सभामुख घिमिरेले संसदीय समितिहरु लामो समय ज्येष्ठ सदस्यको नेतृत्वमा सञ्चालन गर्न नहुने भएकाले नेतृत्व चयन प्रक्रियामा गम्भीर हुन आग्रह गरेको बताए । 

उनले दलहरुले पहल नगर्ने भए आफुले नै नेतृत्व चयनका लागि मिति तोक्ने समेत बताएका थिए । जवाफमा दलहरुले प्रमुख सचेतकहरुसंग छलफल गरेर नेतृत्व चयन प्रक्रिया अघि बढाउने बताएका थिए । 

छलफलपछि सभामुख घिमिरेले संसदीय समितिलाई प्रभावकारी बनाउनका लागि दलहरुबाट आवश्यक सुझाव लिएको बताए । ज्येष्ठ सदस्यले नेतृत्व गर्दा विधेयकका छलफलहरु अगाडि बढ्न नसकेको अवस्थामा छिट्टै नै समितिले नेतृत्व पाउने गरि छलफल भएको उनले बताए । 

‘​​​​संसदीय समितिको सभापति चयन तत्कालै गर्ने नेताहरुले प्रतिबद्धता जनाउनुभएको छ।’ घिमिरेले भने, ‘छिट्टै नै समितिले नेतृत्व पाउँछ। समितिको नेतृत्व नहुँदा ज्येष्ठ सदस्यबाट बैठक सञ्चालन भइरहेको छ। ज्येष्ठ सदस्यले नेतृत्व गर्दा विधेयकका छलफलहरु अगाडि बढ्न सकेका छैनन्।’

त्यस्तै कानूनमन्त्री धनराज गुरुङले सवै दलका सचेतकहरुसंग छलफल गरेर चाडै संसदीय समितिको नेतृत्व चयनका लागि अघि बढ्ने सहमत भएको जानकारी दिए ।