‘राजश्व संकलन बढेसँगै अर्थतन्त्रमा सकारात्मक संकेत देखिएकाे छ’

१९ असार, काठमाडौं । अर्थमन्त्री डा. प्रकाशशरण महतले अहिले राजश्व संकलनमा वृद्धि भएर अर्थतन्त्रमा सकरात्मक संकेत देखिएको दाबी गरेका छन् । 

मंगलबार संसदको अर्थसमितिको बैठकमा बोल्दै डा. महतले अर्थतन्त्रमा देखिएको समस्या सुधार भइरहेको बताए । उनले समस्या आउने हट्ने चल्ने बताउँदै समस्यामा आउँदा सुल्झाउने विषयमा सरकार सधैं केन्द्रित भएको बताए । 

सांसदहरुले उठाएको प्रश्नको जवाफ दिने क्रममा मन्त्री डा. महतले अर्थतन्त्र चलायमान बनाउन काम भइरहेको बताएका थिए । अहिले पनि अर्थतन्त्र चलायमान बनाउन अर्थमन्त्रालयले समन्वयकारी भूमिका खेलिरहेको बताए । पछिल्लो चरणमा राजश्व संकलनमा उल्लेख्य सुधार आएको उनको भनाइ थियो । 

मुलुकको राजश्व सामाजिक सुरक्षा भत्तामा बढी खर्च भइरहेको उनको भनाइ थियो । विपन्न र कमजोर वर्गलाई सुरक्षा भत्ता छुटाउने नहुने भन्दै आवश्यक नभएका समूहको हकमा सोच्नुपर्ने बेला भएको बताएका छन् । 

यसअघि संसद बैठकमा सांसदहरुले शहर बजारमा नौ/दस तले घर भएकालाई वृद्ध भत्ता कटौती गर्नुपर्ने आवाज उठाएका थिए । दस तले घर भएका र गाउँमा गरिब परिवारका व्यक्तिलाई दिने सामाजिक सुरक्षा भत्ता दर एकै किसिमका हुँदा औचित्वमाथि प्रश्न उठ्ने बताउँदै सांसदहरुले आर्थिक अवस्था हेरेर मात्र भत्ता वितरण गर्नुपर्ने आवाज उठाउँदै आएका छन् ।