राष्ट्रियसभामा मन्त्रालयगत विनियोजित बजेटमाथि छलफल जारी

१९ असार, काठमाडौं । राष्ट्रियसभामा मंगलबार बैठकमा आर्थिक वर्ष २०८०÷८१ का लागि सरकारले छुटयाएको बजेटमा विभागीय मन्त्रालयहरुमाथि विनियोजित बजेट शीर्षकमा छलफल भइरहेको छ । पर्यटक, भौतिक पूर्वाधार, भूमि व्यवस्था, सामान्य प्रशासन लगायत मन्त्रालयमाथिको बजेट शीर्षकमा छलफल जारी छ । 

सांसद खिमलाल देवकोटाले प्रस्तुत बजेट असन्तुलित र संघीयता विरोधी रहेको बताएका छन् । वडास्तरबाट गरिने एक दुई लाख दरका बजेट केन्द्र सरकारले छुट्याएर संघीयताको मर्मविपरीत काम गरेको बताए । वडा नै नभएको स्थानमा समेत बजेट छुट्याएर सरकारले लपरवाही गरेको बताए । 

सांसद नारायण दाहालले बजेट समयसामपेक्षमा आधारित भएर आएको भन्दै कार्यान्वयन गरेर देखाउन सबै दल एक ठाउँमा उभिनुपर्ने बताए । सरकारले प्राकृतिक प्रकोपको आकलन गर्न नसक्दा मुग्लिन–नारायणगढ सडकमा हजारौं यात्रुले अहिलेपनि पहिरोका कारण दुःख व्यवहोर्न विवश भइरहेको बताए । 

सुकुम्वासीमाथि अहिले बिनाविकल्प बस्ती उठाएर आतंक मच्चाइएको भन्दै विकल्पका बजेटको व्यवस्था गर्न भूमि व्यवस्थामन्त्रीको ध्यानाकर्षण गराए ।

सांसद गोमा सापकोटाले २० वर्ष पुराना गाडीलाइ इन्जिनकाे अवस्था हेरेर मात्र हटाउनु पर्नेमा जाेड दिइन् । पुराना गाडी गाउँमा पठाउँदा दुर्घटना बढेकाप्रति ध्यान दिन सरकारकाे ध्यानाकर्षण गराइन् ।