सन नेपाल र सिटिजन लाइफलाई प्रिमियम भाउमा आईपीओ बिक्री गर्न बोर्डको अनुमति

१९ असार, काठमाडौं । नेपाल धितोपत्र बोर्डले सन नेपाल लाइफ इन्सुरेन्स र सिटिजन लाइफ इन्स्योरेन्सलाई आईपीओ बिक्री गर्न अनुमति प्रदान गरेको छ । सन नेपालले कुल ९६ लाख कित्ता आईपीओ बिक्री गर्न अनुमति पाएको छ । जसमध्ये ४ लाख ८० हजार कित्ता कम्पनीका कर्मचारीहरूका लागि सुरक्षित गरिएको छ । 

सर्वसाधारणलाई प्रिमियमसहित प्रति कित्ता २३९ रूपैयाँ र कर्मचारीलाई फेस भ्याल्यू अर्थात प्रतिकित्ता १०० रूपैयाँमै आईपीओ बिक्री गर्न बोर्डले सन नेपाललाई अनुमति दिएको हो । यसले जारी पुँजीको ३० प्रतिशत आईपीओ बिक्री गर्न लागेको हो । यसमा नेपाल एसबीआई मर्चेन्ट बैंकिङ बिक्री प्रबन्धक रहेको छ । 

यता, सिटिजन लाइफले पनि कुल १ करोड १२ लाख ५० हजार कित्ता आईपीओ बिक्री गर्न अनुमति पाएको छ । जसमध्ये ५ लाख ६२ हजार ५०० कित्ता कम्पनीका कर्मचारीहरूका लागि सुरक्षित गरिएको छ ।

बोर्डले सर्वसाधारणलाई प्रिमियमसहित प्रति कित्ता २४४ रूपैयाँ र कर्मचारीलाई फेस भ्याल्यूमै आईपीओ बिक्री गर्न बोर्डले अनुमति दिएको हो । सिटिजनले पनि जारी पुँजीको ३० प्रतिशत आईपीओ बिक्री गर्न लागेको हो । यसमा एनआइबीएल एस क्यापिटल बिक्री प्रबन्धक रहेको छ ।