ललितानिवास जग्गा हिनामिनाका आरोपीमाथि संगठित अपराधमा समेत अनुसन्धान गर्न अनुमति

१९ असार, काठमाडौं । प्रधानमन्त्रीको सरकारी निवास बालुवाटारस्थित सरकारी स्वामित्वको ललितानिवास जग्गा प्रकरणका आरोपीहरुविरुद्ध संगठित अपराधको कसुरमा समेत अनुसन्धान गर्न अदालतले अनुमति दिएको छ ।

जिल्ला अदालत काठमाडौंले मंगलबार प्रहरीको केन्द्रीय अनुसन्धान ब्युरो (सीआईबी)लाई यो प्रकरणमा संलग्नविरुद्ध लिखत किर्तेका साथै संगठित अपराधमा समेत अनुसन्धान गर्न अनुमति दिएको हो ।

ब्युरोले यो प्रकरणमा जोडिएकाविरुद्ध मुलुकी ऐन २०२० को सरकारी लिखत किर्तेसम्बन्धी महलमा अनुसन्धान गर्न अदालतबाट अनुमति पाइसकेको छ । त्यसयता ९ जना पक्राउ परिसकेका छन् । किर्ते कसुरमा २५ दिनभित्र अनुसन्धान टुंग्याएर मुद्दा अदालतमा पुर्‍याइसक्नुपर्छ । तर संगठित अपराध कसुरमा ६० दिनसम्म अनुसन्धान गर्न अनुमति हुन्छ । 

यसअघि नक्कली भुटानी शरणार्थी प्रकरणमा पनि संगठित अपराध कसुर मुद्दासमेत आकर्षित भएका कारण पक्राउ परेकाहरुलाई ६० दिनसम्म अनुसन्धान गरेर (केहीबाहेक) मुद्दा चलाइएको थियो । 

सीआईबीका एसएसपी दिनेश आचार्यले अदालतबाट थप ७ दिन थुनामा राखेर अनुसन्धान गर्न अनुमति पाएको बताए । अनुमतिअनुसार आरोपीहरुविरुछ किर्ते र संगठित अपराध गरी दुई कसुरमा अनुसन्धान हुने बताए । यसअघि ब्युरोले लिखत किर्ते कसुरमा मात्र अनुसन्धान गर्न ७ दिनको अनुमति पाएको थियो ।

यो पनि पढ्नुहोस