पूर्वमन्त्री शेर्पालाई कसले थ्रेट गर्यो र हतियार किन्नु पर्यो ?

२० असार, काठमाडौं । पूर्वमन्त्री समेत रहेका नेकपा एमालेका नेता कृपाशुर शेर्पाले निजी हतियार खरिदका लागि अनुमति मागेका छन् । जिल्ला प्रशासन कार्यालयमा एक निवेदन दिँदै आफूलाई सुरक्षा थ्रेट रहेको जनाएर निजी हतियार खरिदको माग गरेका हुन् । ‘उहाँले आफू असुरक्षित रहेको भन्दै सुरक्षाका लागि हतियार किन्न अनुमति माग्नु भएको थियो’, जिल्ला प्रशासन कार्यालय काठमाडौंका एक अधिकृतले भने । ती अधिकृतका अनुसार शेर्पाले कसबाट कसरी सुरक्षा थ्रेट भयो भन्ने बारेमा कुनै विवरण खुलाएका छैनन् ।

कोही कसैले हतियार राख्न चाहेमा नयाँ हतियार खरिदको सिफारिस गर्नुअघि सो को विश्वसनीय कारण र आधार पेश गर्नुपर्ने हुन्छ । कृपाशुरले त्यस्तो केही पेश नगर्दा खरिद अनुमति पाएका छैनन् । जिल्ला प्रशासन कार्यालयले पनि सुरक्षा थ्रेटको पूरै विवरण खुलाएर मात्रै हतियार खरिदका लागि गृहमन्त्रालयमा सिफारिस गर्नसक्छ । तर शेर्पाको हकमा भने कुनै पनि निर्णय गरेको छैन । सुरक्षा थ्रेट भए सरकारले सुरक्षाकर्मी (पीएसओ) खटाउने व्यवस्था छ भएपनि उनको हकमा भने विना निवेदन सुरक्षाकर्मी पनि खटाएको छैन ।

एमालेभित्र शेर्पा पारिवारिक विवादमा फसेका नेता हुन् । उनका दुई श्रीमती रहेको भन्दै यसअघि विवादमा आएका थिए । पर्यटन मन्त्री नियुक्त भएकै बेलादेखि शेर्पा विवादमा तानिएका थिए । छोरा गणेश शेर्पालाई नागरिकता नदिएको विषयले उनको झण्डै मन्त्री पद नै फुस्किने अवस्थामा पुगेको थियो । त्यति बेला पार्टी उपाध्यक्ष विद्या भण्डारीले स्थायी समितिमा त्यसलाई बैठकको एजेण्डा नै बनाएकी थिइन । तर, अध्यक्ष केपी ओलीको पहलमा विवाद साम्य भएको थियो ।

त्यसपछि मन्त्री शेर्पा छोरालाई नागरिकता दिलाउन बाध्य भएका थिए । अंश मुद्दामा उनी पटक पटक विवादमा आउने गरेका छन् । कृपाशुर शेर्पाले सरकारी कर्मचारी हुँदा दलित महिलामाथि यौन दुराचार गरेर छोरा जन्मिएको र उनका छोरा गणेशले नागरिकता नपाएको समाचार प्रकाशित भएपछि उनी विवादित भएका थिए । अंश विवाद र घरायसी झमेलामा रहेका बेला कुनै बेला शेर्पाले छोरा बुहारीलाई नै गोलीले उडाइदिने धम्की दिएर गौशाला प्रहरीमा थुनाएका थिए ।