दोहोरो नागरिकता धन्दा मौलाउँदै, कञ्चनपुरमा २ जना पक्राउ

२० असार, काठमाडौं । कञ्चनपुरमा दोहोरो नागरिकता लिएको अभियोगमा प्रहरीले दुई जनालाई पक्राउ गरेको छ । पक्राउ पर्नेमा बैतडीको पञ्चेश्वर गाउँपालिका–५ का ३९ वर्षीया कलावती चन्द र ५८ वर्षीय गम्भीर चन्द छन् ।

दोहोरो नागरिकता बोकेको उजुरी परेपछि उनीहरुलाई पक्राउ गरिएको हो । उनीहरुसँग भारतीय नागरिकता समेत रहेको बताइएको छ ।

कञ्चनपुर जिल्ला अदालतबाट म्याद थप गरी उनीहरुबारे अनुसन्धान अघि बढाइएको जिल्ला प्रहरी कार्यालय कञ्चनपुरले जनाएको छ । पछिल्लो भारतसँग सीमाना जोडिएका जिल्लाहरुमा दोहोरो नागरिकता लिने र दिलाउने घटनामा व्यापक वृद्धि भएको पाइएको छ । 

यसअघि सोमबार रुपेन्देहीको बुटवलबाट भारतीय नागरिकता दिलाउन नक्कली बाबु आमा बनेको आरोपमा प्रहरीलाई एक दम्पत्तिलाई पक्राउ गरेको थियो ।
्