एसईईको नतिजा प्रकाशन गर्न १९ कम्पनीलाई अनुमति

२० असार, काठमाडौं । यस वर्षको माध्यमिक शिक्षा परीक्षा (एसइई)को नतिजा प्रकाशन गर्न १९ वटा संस्थालाई अनुमति दिइएको छ । राष्ट्रिय परीक्षा बोर्डको परीक्षा नियन्त्रण कार्यालय कक्षा १० ले १९ वटा कम्पनीलाई नतिजा उपलब्ध गराउन अनुमति दिएको हो । 

अनुमति पाएको संस्थाले वेबसाइट, एसएमएस र आईभीआरबाट नतिजा उपलब्ध गराउन सकिने बोर्डले जनाएको छ । अनुमति पाएकामध्ये १४ वटा संस्थाले वेबसाइट र बाँकीले एसएमएस र आईभीआरबाट नतिजा हेर्न सकिने गरी व्यवस्था गर्नेछन् । 

अनुमति प्राप्त गर्ने संस्थाहरुमा नेपाल टेलिकम, एनआईसी एसिया बैंक, इडियु संजाल, कान्तिपुर पब्लिकेशन्स्, द कनेक्ट प्लस प्रालि, खल्ती प्रालि लगायतका संस्थाले वेबसाइटमार्फत नतिजा उपलब्ध गराउनेछन् । नेपाल टेलिकम, जानकी टेक्नोलोजी प्रालि, इजी सर्भिस प्रालि, आकाश टेक प्रालि लगायतका ५ वटा संस्था र फर्मले एमएमएस र आईभीआरमार्फत नतिजा उपलब्ध गराउनेछन् । बोर्डले आफ्नो वेभसाइटमा उप्लब्ध गराउने जनाएको छ । 

बोर्डले एसईई नतिजा यही शनिबार प्रकाशन गर्ने तयारी गरेको छ । नतिजा पुरानै प्रणाली (लेटर ग्रेड्रि)बाट सार्वजनिक गर्ने भएको छ । जसअनुसार ३५ भन्दा कम अंक ल्याउने विद्यार्थीको नतिजा नन ग्रेडेड (एनजी) लेखिने र मूल प्रमाणपत्र नदिने व्यवस्था छ । 

गत चैत १७ गतेदेखि सञ्चालित एसईई परीक्षामा ४ लाख ८५ हजार ३ सय ९६ विद्यार्थी सहभागी थिए ।