अत्तरियाको मालाखेती अस्पतालका स्वास्थ्यकर्मी ६ महिनादेखि तलबविहीन

२० असार, काठमडौं । कैलालीको अत्तरियास्थित मालाखेती अस्पतालमा कार्यरत स्वास्थ्यकर्मीहरूले ६ महिनादेखि तलब पाएका छैनन् ।

संघीय सरकारबाट खटिएका स्वास्थ्यकर्मीले तलब पाउन नसकेका हुन् । पालिकाबाट आएका कर्मचारीहरुले भने तलब, सेवा सुविधा पाएका छन् । 

पन्ध्र शैय्यासहित नगर अस्पतालको रुपमा सञ्चालित मलाखेती अस्पतालले पर्याप्त भौतिक पूर्वाधार अभावमा स्वास्थ्य उपचार सेवा प्रवाहमा समस्या झेल्दै आइरहेको बेला स्वास्थ्यकर्मी नै तलबको मारमा परेका छन् । 

पूर्वाधारमा अभावमा दुर्घटनाका घाइतेलाई उपचार सेवा दिन नसकेको अस्पतालमा एक चिकित्सकले बताए ।मलाखेतीलाई प्रदेशकै ट्रमा हस्पिटलको स्तरमा विकास गर्नुपर्ने चिकित्सकहरुको भनाइ छ । अस्पतालमा दैनिक २ सय बढी बिरामी उपचारमा आउने गरिएको उनीहरु बताउँछन् । 

हाल मालाखेती अस्पतालमा एक जना विशेषज्ञसहित चार जना चिकित्सक कार्यरत छन् । १४ जना नर्सिङ स्टाफ छन् । चारै जना चिकित्सक छात्रवृत्ति करार सेवामा छन् । २८ जनाको स्थायी दरबन्दी रहेको अस्पतालमा ५२ जना जनशक्ति कार्यरत छन् । 

संघबाट खटिएका ४ जना चिकित्सकसहित स्वास्थ्यकर्मीले ६ महिनादेखि तलब पाएका छैनन् । तलब नपाउँदा उनीहरु तनावमा परेका छन् ।