गैंडाको माउ-बच्चा मारेको घटनामा डकर्मीसहित ३ जना पक्राउ, अभियुक्तसम्म यसरी पुगे प्रहरी

२० असार, चितवन । गैंडाको माउ र बच्चा मारेको अभियोगमा प्रहरीले ३ जनालाई पक्राउ परेका छन् । गत १२ जेठमा नै नेपाल प्रहरीको केन्द्रीय अनुसन्धन ब्यूरो (सीआईबी)को टोलीले पक्राउ गरेको उनीहरुलाई बुधबार मात्र पत्रकार सम्मेलन गरी चितवन राष्ट्रिय निकुञ्जले सार्वजनिक गरेको हो । 

दुई गैंडा मारेको घटनामा प्रत्यक्ष संलग्नको आरोपमा पश्चिम नवलपरासी रामग्राम नगरपालिका–१८ घरमपुर बस्ने कृष्णबहादुर महतो पक्राउ परेका हुन् । त्यस्तै खाग किनबेचको आरोपमा सिखाराम थारु र होमबहादुर बिक पक्राउ परेका हुन् । घटनामा संलग्न अन्य दुई जना फरार रहेको प्रहरीको भनाइ छ । 

गत माघ ६ गते पूर्वी नवलपरासीको मध्यविन्दु नगरपालिका–२ सीतापुर नजिकैको क्रान्तिघाटमा गैंडाका माउ बच्चा मृत अवस्थामा भेटिएका थिए । १४ वर्षको पोथी गैंडालाई करेन्ट लगाएर मारेपछि खाग काटिएको अवस्था फेला परेको थियो । त्यसपछि सुरु गरिएको अनुसन्धानका क्रममा उनीहरुलाई पक्राउ गर्न सफल भएको थियो । पक्राउका लागि टोलीले खाग किन्ने ग्राहक बनेर पिछा गरेको थियो । 

पक्राउ परेकाबाट बरामद खागको प्राविधिक जाँचपछि घटनामा संलग्नताको पुष्टि भएको चितवन राष्ट्रिय निकुञ्जका प्रमुख संरक्षण अधिकृत डिलबहादुर पुर्जा पुनले जानकारी दिएका छन् । अभियुक्त महतो डकर्मी हुन् । उनी छिटाे पैसा कमाउने लाेभमा चाेरी शिकारीमा लागेकाे पाइएकाे छ ।

अभियुक्तहरुको साटठबाट लु ४५ प ५११७ नम्बरको मोटरसाइकल, ४ वटा मोवाइल, गैंडाको खाग, बाँसको किल्ला र बेण्डिङ तारलगायत चोरी शिकारीका लागि प्रयोग गरिने सामान बरामद गरिएको छ । पक्राउ परेका तीनै जनाविरुद्ध नवलपुर जिल्ला अदालतमा मुद्दा दर्ताका लागि लगिएको छ । 

राष्ट्रिय निकुञ्ज वन्यजन्तु संरक्षण ऐन, २०२९ को दफा ५ को उपदफा १ को खण्ड (क)ले निषेध गरेको कसुर अपराध गरेकोले सोही ऐनको दफा २६ को उपदफा १ बमोजिम ५ देखि १० लाखसम्म जरिवाना, ५ देखि १५ वर्षसम्म कैद सजाय वा दुबै सजाय हुने व्यवस्था छ ।

अभियुक्तहरुले गैंडा मार्न युटुब हेरेर योजना बनाएको र पटकपटकको प्रयासपछि मार्न सफल भएको बयान प्रहरीलाई दिएका छन् । योजना अनुसार घटनास्थल नजिकै रहेको मन्दिरबाट जीआई तारबाट करेन्ट लगाएर गैंडा मारेको पाइएको छ । 

चितवन राष्ट्रिय निकुञ्जका अनुसार चालु आर्थिक वर्षको अन्तिमसम्म ३ गैंडा चोरी शिकारीले मारेका छन् ।