एक वर्षपछि कांग्रेस सभापति देउवाले बोलाए केन्द्रीय समिति बैठक

२० असार, काठमाडौं । सत्ता साझेदारी मुख्य दल नेपाली कांग्रेसले केन्द्रीय समितिको बैठक बोलाउने निर्णय गरेको छ । बुधबार सभापति शेरबहादुर देउवा, उपसभापति धनराज गुरुङ तथा महामन्त्रीद्वय गगन थापा र विश्वप्रकाश शर्मासहित बसेको बैठकले यही असार २७ गते केन्द्रीय समिति बैठक बोलाउने निर्णय गरेको हो । 

२७ असारदेखि केन्द्रीय समितिको बैठक सुरु गर्ने गरी बैठक बोलाउने निर्णय भएको कार्यवाहक मुख्यसचिव प्रदीप पराजुलीले बताए । कांग्रेसको विधान अनुसार केन्द्रीय समिति बैठक हरेक दुई महिनामा बस्नुपर्ने व्यवस्था छ । तर गत वर्ष असार २७ देखि साउन २ सम्म बसेपछि बैठक बस्न सकेको छैन । 

बैठक बस्न नसक्दा महामन्त्री थापा पक्षले सभापति शेरबहादुर देउवाको आलोचना गर्दै आएको छ । बैठक बोलाउन माग गर्दै केन्द्रीय कार्यालयमा केही केन्द्रीय सदस्यहरूले निवेदन समेत दिएका छन् ।