प्रधानमन्त्री प्रचण्डको अभिव्यक्तिलाई लिएर एमालेले गर्यो राष्ट्रियसभा बैठक अवरुद्ध

२० असार, काठमाडौं । प्रधानमन्त्री प्रचण्डले सोमबार एक क्रममामा दिएको अभिव्यक्तिप्रति आपत्ति जनाउँदै प्रमुख प्रतिपक्षी नेकपा (एमाले)ले बुधबार राष्ट्रियसभाको बैठक अवरुद्ध गरेको छ ।

सोमबार काठमाडौंमा एक पुस्तक विमोचन कार्यक्रममा आफूलाई प्रधानमन्त्री बनाउन सरदार प्रितम सिंह पटकपटक भारतको नयाँ दिल्ली गएको भनी दिएको अभिव्यक्तिलाई लिएर एमालेले प्रधानमन्त्रीको जवाफ माग गर्दै बैठक अवरुद्ध गरेको हो । जवाफ नआएसम्म बैठक चल्न नदिने भन्दै एमालेका सांसदहरु कुर्सीबाट उठेर बैठक अवरुद्ध गरेका हुन् । सांसद देवेन्द्र दाहालले नैतिकता आधारमा प्रधानमन्त्रीले पदबाट तत्काल राजीनामा दिनुपर्ने माग गरे ।

सभाका अध्यक्ष गणेश तिमल्सिनाले आसन ग्रहण गरेर बैठक सुचारु गर्न गरेको पटकपटकको आग्रहपछि पनि अवरोध नहटेपछि बैठक ३ बजेर १ मिनटेसम्मका लागि स्थगित गरिएको छ ।