एमालेको अवरोधपछि राष्ट्रियसभाको बैठक स्थगित

२० असार, काठमाडौं । प्रमुख प्रतिपक्षी दल नेकपा (एमाले)को अवरोधका कारण बुधबार बसेको राष्ट्रियसभाको बैठक सुरु भएको केहीबेरै स्थगित भएको छ ।

सोमबार काठमाडौंमा भएको पुस्तक विमोचन कार्यक्रममा प्रधानमन्त्री प्रचण्डले सरदार प्रितम सिंह आफूलाई प्रधानमन्त्री बनाउन पटकपटक भारतको नयाँ दिल्ली गएको भनी अभिव्यक्ति दिएका थिए । सोही अभिव्यक्तिलाई लिएर एमालेका सांसदहरुले आजको राष्ट्रियसभाको बैठक सुरु भएलगत्तै कुर्सीबाट उठेर प्रधानमन्त्रीको जवाफ माग गर्दै बैठक अवरद्ध गरेका हुन् 

प्रधानमन्त्रीको अभिव्यक्तिले संसदको शिर निहुरिएको र विदेशीले बनाएका प्रधानमन्त्री नमान्ने भन्दै उनीहरुले राजीनामा समेत मागेका छन् । प्रधानमन्त्रीले चित्तबुझ्दो जवाफ नदिएसम्म बैठक चल्न नदिने उनीहरुको अडान छ । प्रधानमन्त्रीले पदमा बस्ने नैतिकता गुमाइसकेको बताउँदै एमाले सांसद देवेन्द्र दाहालले राजीनामा माग गरे ।

अवरोध नहटेपछि सभाका अध्यक्ष गणेशप्रसाद तिमल्सिनाले आजै दिउँसो ३ बजेर १ मिनेटसम्मका लागि बैठक स्थगन गरेका छन् । बैठकमा ऊर्जा, स्वास्थ्य, सामान्य प्रशासन लगायत मन्त्रालयमाथि आगामी आवका लागि विनियोजित बजेटमाथि छलफल गर्ने कार्यसूची रहेको छ ।

यो पनि पढ्नुहोस