चवारी चालक अनुमति पत्रको नवीकरण अवधि १० बर्ष पुर्याइयो

२० असार, काठमाडौं । सरकारले सवारी चालक अनुमतिको नवीकरण अवधि बढाएर १० वर्ष पुर्याएको छ । अनुमति पत्रकाे राजश्व समेत अनलाइनमार्फत भूक्तानी गर्न सकिने भएकाे छ ।

भौतिक पूर्वाधार तथा यातायात मन्त्री प्रकाश ज्वालाले बुधबार मन्त्रालयमा आयोजित विद्युतीय सेवा प्रवाह शुभारम्भ कार्यक्रममा बोल्दै आगामी साउन १ गतेदेखि लागू हुने गरी हरेक १०/१० वर्षमा मात्र नवीकरण गर्दा हुने व्यवस्था गरिएको जानकारी दिएका छन् । 

अहिलेसम्म यसअघि नवीकरण हरेक पाँच/पाँच वर्षमा गर्नुपर्ने व्यवस्था छ । पाँच वर्षै पिच्छे नवीकरण गर्नुपर्ने व्यवस्थाले यातायात व्यवस्था कार्यालयहरूमा सेवाग्राहीकाे भीड लाग्ने अवस्थालाई हटाउन सरकारले नयाँ र व्यवहारिक कानुन ल्याएको मन्त्री ज्वालाले बताए । ‘लाइसेन्स नवीकरणका लागि अब यातायात कार्यालयमा लाइन बस्नै पर्दैन’ उनले भने, ‘भीड कम भएर जान्छ ।’

यस्तै सवारी साधनको कर अब मोबाइलबाटै तिर्न सकिने व्यवस्था समेत गरेको उनले बताए । स्मार्ट लाइसेन्स वितरणमा संख्या अभावलाई पनि छिट्टै समाधान गरिने बताए । देशभित्रै स्मार्ट लाइसेन्स प्रिन्ट गर्न प्रिन्टर खरिदका लागि सरकारले बजेट छुट्याइसकेको र खरिदको प्रक्रियामा गइसकेको जानकारी पनि मन्त्री ज्वालाले दिए ।

‘स्मार्ट कार्डकाे आयु नै २० वर्षकाे हुने भएपछि पाँच पाँच वर्षमा चाहिँ किन नवीकरण किन गराउनु पर्याे’ उनले भने । कार्ड पाउन नसकेर थुप्रै याेग्य चालक ड्राइभिङमा वैदेशिक रोजगारमा जान पाएका छैनन् ।

सरकारले कागजी लाइसेन्स हटाएर स्मार्ट लाइसेन्समा जाने निर्णय गरेपनि चालकलाई पर्याप्त मात्रामा स्मार्ट कार्ड उपलब्ध गराउन नसक्दा शुल्क तिरेर बसेका चालकहरू मर्कामा परेका छन् ।

यस्तै, सार्वजनिक यातायातलाई व्यवस्थित र अध्ययन गर्न बनेको यातायात सुधार सुझाव कार्यदलले दिएको प्रतिवेदनलाई सरकारले छिट्टै कार्यान्वयनमा लैजान उनको भनाइ थियो । कर लगायत विषयमा जानकारी मोवाइलमा एसएमएस आउने बताए । सार्वजनिक यातायातमा बेथिति बढेको गुनासो व्यापक मात्रामा आइरहेको बताउँदै यसलाई रोक्न सरकार गम्भीर रहेको बताए ।