घोराही सिमेन्टको आईपीओमा काण्डै काण्ड, छानबिन गरी कारवाही गर्न प्रहरीलाई पत्र

२० असार, काठमाडौं । घोराही सिमेन्टको आईपीओ निष्कासनका क्रममा लगानीकर्तालाई प्रभावित बनाउने अनुचित कार्य गरेको पाइएको छ । लगानी बोर्डले फर्जी आवेदन दिएर  सर्वसाधारण लगानीकर्तालाई भ्रमित बनाउने गरि भएको अनुचित कार्यको छानबिन गर्न नेपाल प्रहरीसँग पत्र पठाएर आग्रहसमेत गरेको छ ।  

बोर्डले फर्जी आवेदनको अनुसन्धान गर्न नेपाल प्रहरीलाई जिम्मा लगाएको हो । कुल १२ जनाले खातामा पैसा नहुँदा नहुँदै समेत १०-१० लाख कित्ताका लागि आवेदन दिएको पाइएपछि बोडले समिति नै बनाएर छानविन गरेको थियो । बोर्डले घोराही सिमेन्टको सार्वजनिक निष्कासन सम्बन्धमा धेरै कमीकमजोरी भेटिएको जनाएको छ । 

लगानीकर्ताको हित संरक्षणलाई मध्यनजर गर्दै सार्वजनिक निष्कासन स्थगित गरिएको कम्पनीमाथि जाँचबुझका लागि बोर्डले समिति गठन गरेको थियो । सो समितिले विभिन्न चार निर्णयसहितको प्रतिवेदन सार्वजनिक गरेको छ । प्रतिवेदनअनुसार केही लगानीकर्ताले बैंक खातामा पर्याप्त रकम नहुँदा नहुँदै सर्वसाधारण लगानीकर्तालाई भ्रमित पार्ने उद्देश्यले अस्वाभाविक रूपमा ठूलो कित्ता सेयर खरिद गर्न आवेदन दिएको उल्लेख गरेको छ । 

यसबारे थप छानबिन गर्न बोर्डले नेपाल प्रहरी समक्ष आग्रह गरेको हो । निष्कासन तथा बिक्री प्रबन्धकले मागभन्दा बढी कित्ता सेयर खरिदको लागि आवेदन परेको अवस्थामा समेत समयावधि थप गर्न सूचना प्रकाशित गरेको पनि भेटिएको छ । यसरी सीमित व्यक्तिलाई लाभ पुर्याउने उद्देश्यले बिक्री प्रबन्धकबाटै झुक्किएका सर्वसाधारणको लगानी के हुने भन्ने प्रश्न नै उठेको थियो । यसमा भने बोर्डले रकम फिर्ता गराउने निर्णय गरेको छ ।   

सुरुमै विवादमा परी अलपत्र परेको घोराही सिमेन्टको आईपीओ भरेकाहरूको पैसा फिर्ता गर्न तीन दिनको समय दिइएको छ । यो अवधिमा आवेदकहरूले दिएको पुरानो आवेदन पनि परिमार्जन गर्ने सुविधा धितोपत्र बोर्डले दिएको छ । विज्ञप्ति जारी गर्दै बोर्डले शेयरमा आवदेन दिएका लगानीकर्ताहरुले शेयर थपघट गर्नेदेखि आवेदन फिर्ता वा खारेज गर्न मिल्ने मौका दिएको छ । 

घोराही सिमेन्टको आईपीओमा सर्वसाधारणको कुल ३ अर्ब ६१ करोड रूपैयाँ रकम होल्ड भइरहेको बोर्डको दावी छ । बोर्डका अनुसार बिक्री प्रबन्धकले पुनः यसबारे सूचना प्रकाशित गर्नेछ । सूचना प्रकाशित भएको तीन दिन भित्र पैसा फिर्ता दिने अथवा रद्द गर्न निवेदन दिनुपर्नेछ । उक्त तीन दिनमा पर्याप्त आवेदन नआए बोर्डले आईपीओ आवेदनको म्याद थप ७ दिनसम्म लम्ब्याउने अनुमति दिएको छ । यस अवस्थामा भने यसअघि घोराही सिमेन्टको आईपीओमा आवेदन नदिएकाहरुले समेत आवेदन दिन पाउने भएका छन् । 

बोर्डकाे अनुसन्धानमा एनआइसी एशिया बैंक पनि मुछिएको छ । पैसा नभएको खाताबाट बुझाएको आवेदन बैंकले स्वीकृत गरेको भन्दै बोर्डले कैफियत देखाएको हो । रकम नहुँदा पनि कसरी स्वीकृत भयो भनेर स्पष्टीकरण सोध्ने भएको छ । बोर्डले पर्याप्त आवेदन पर्दा पर्दै पनि आईपीओ आवेदनको म्याद लम्ब्याउने कम्पनी र बिक्री प्रबन्धकको निर्णयलाई पनि छानबिन गर्ने भएको छ ।