प्रतिनिधिसभाको बैठक बिहीबार बस्ने गरी स्थगित

२० असार, काठमाडौं । प्रमुख प्रतिपक्षी नेकपा (एमाले) र प्रतिपक्षी दल रास्वपा, राप्रपाको अवरोधका कारण आधा घण्टाका लागि स्थगित प्रतिनिधिसभाको बैठक बिहीबार दिउँसो २ बजेसम्मका लागि स्थगित भएको छ ।

प्रधानमन्त्री पुष्पकमल दाहाल ‘प्रचण्ड’ले आफूलाई प्रधानमन्त्री बनाउन भारतीय नागरिक प्रितम सिंह पटकपटक दिल्ली धाएको भनी दिएको भन्दै एमालेले आज संसद अवरोध गरेको थियो । एमालेका सांसदहरुले प्रधानमन्त्रीको राजीनामा समेत मागेका छन् । 

दिउँसो ४ बजे सुरु भएको बैठक एमालेको अवरोधपछि सभामुख देवराज घिमिरेले आधा घण्टाका लागि बैठक स्थगित गरेका थिए । तर पुनः बैठक सञ्चालन गर्ने विषयमा दलहरुबीच सहमति नजुटेपछि बिहीबारसम्मका लागि बैठक स्थगित गरिएको संघीय संसद सचिवालयले जनाएको छ । 

यस्तै, आज बसेको राष्ट्रियसभा बैठक पनि प्रधानमन्त्री प्रचण्डको अभिव्यक्तिलाई लिएर भएको एमालेको विरोधका कारण भोलिसम्मका लागि स्थगित भएको छ ।