सीआईबीको भ्याकेट निवेदन र बन्दी प्रत्यक्षीकरणको रिटकाे सुनुवाई श्रेष्ठ र रेग्मीकाे संयुक्त इजलासमा हुने

२१ असार, काठमाडौं । ललितानिवास जग्गा हिनामिना प्रकरणमा पक्राउ परेकाले दिएको बन्दी प्रत्यक्षीकरणसम्बन्धी रिट आज न्यायाधीशद्वय विश्वम्भरप्रसाद श्रेष्ठ र कुमार रेग्मीको इजलाशमा परेको छ ।

पूर्व निर्वाचन आयुक्त सुधीरकुमार शाह, भाटभटेनी सुपरमार्केटका संस्थापक अध्यक्ष मीनबहादुर गुरुङ र धर्मप्रसाद गौतमका तर्फबाट सर्वोच्च अदालतमा रिट दायर गरेका थिए । सो प्रकरणमा आफूहरूलाई कानूनविपरीत पक्राउ गरिएको उनीहरूको जिकिर छ ।

रिटमा प्रारम्भिक सुनुवाइपछि न्यायाधीश डा. कुमार चुडालको इजलाशले कारण देखाऊ आदेश जारी गरेको थियो । यसै गरी नेपाल प्रहरीको केन्द्रीय अनुसन्धान ब्यूरो (सीआईबी) ले दिएको भ्याकेट निवेदनको पनि आज सुनुवाई हुँदैछ । 

सीआईबीको भ्याकेट निवेदन पनि न्यायाधीशद्वय श्रेष्ठ र रेग्मीको इजलासमा पेसी चढेको छ । तर, न्यायाधीश रेग्मी उक्त प्रकरणमा आफैँ सम्बन्धित रहेकाले सुनुवाई गर्न नमिल्ने देखिएको छ ।